ភ្នំពេញ៖សមត្ថកិច្ចឃាត់ខ្លួនបុរសអ្នក លក់អង្ករម្នាក់ ដោយសារបុរសនេះមិនសងលុយថ្លៃរត់ការយកគោរមងារឧកញ៉ាហើយ វាយអ្នករត់ការឲ្យរងរបួសបែកមុខបែកមាត់ថែមទៀត ។
ករណីបង្កហិង្សានេះ កើតឡើងកាលពីល្ងាចថ្ងៃទី០៣ ខែកក្កដា នៅចំណុចសង្កាត់ទួលសង្កែ ខណ្ឌឬស្សីកែវ ហើយត្រូវសមត្ថកិច្ចឃាត់ខ្លួនយកៅសាកសួរទាំងពីរនាក់។
សមត្ថកិច្ចបានឲ្យដឹងថា ជនបង្កហេតុមានឈ្មោះ រិន បូរ៉ាន់ ភេទប្រុស អាយុ៣២ឆ្នាំ ស្នាក់នៅផ្ទះកើតហេតុ មានមុខរបរជាអ្នកជួញដូរអង្ករ ចង់ក្លាយខ្លួនជាឧកញ៉ា បានពឹងពាក់ជនរងគ្រោះមានឈ្មោះ ហេង សុខ ភេទប្រុស អាយុ៥៧ឆ្នាំ ស្នាក់នៅផ្ទះលេខ៨៤B ផ្លូវលេខ៤៣០ សង្កាត់ទំនប់ទឹក ខណ្ឌចំការមន មុខរបរជំនួយការលោក នាង ផាត រដ្ឋលេខាធិការក្រសួងការពារជាតិ អោយជួយរត់ការយកគោរមងារឧកញ៉ា ដោយសន្យាប្រគល់ប្រាក់ចំនួន៣ម៉ឺនដុល្លារសហរដ្ឋអាមេរិក។
តាមកំណត់សមត្ថកិច្ចបានឲ្យដឹងថា កាលពីខែ មីនា កន្លងទៅ ជនសង្ស័យឈ្មោះ រិន បូរ៉ាន់បានណាត់ជនរងគ្រោះ ហេង សុខ ឲ្យមកជួបគ្នាផឹកកាហ្វេនៅម្តុំរង្វង់មូលទួលគោក។ ក្នុងការណាត់ជួបនេះគឺទាក់ទងនឹងការរត់ការយកគោរមងារជាឧកញ៉ាបានសម្រេចហើយតែ រិន បូរ៉ាន់ ដែលជាអ្នកពឹងពាក់បានប្រគល់សេកមួយសន្លឹក(សែកស្អុយ)មានទឹកប្រាក់ចំនួន៣ម៉ឺនដុល្លារអាមេរិកឲ្យទៅជនរងគ្រោះ ហេង សុខ ។
នៅពេលជនរងគ្រោះទៅបើកលុយត្រូវខាងធានាគារប្រាប់ថា ម្ចាស់សែកនោះគ្មានប្រាក់នៅក្នុងគណនីទេ ។ពេលនោះជនរងគ្រោះបានទូរស័ព្ទទៅសួរជនសង្ស័យ តែត្រូវបានជនបង្កសន្យាថា ចាំថ្ងៃនេះថ្ងែនោះជាបន្តបន្ទាប់ រហូតមកដល់ថ្ងៃទី០៣ ខែកក្កដា នេះ ជនបង្ក រិន បូរ៉ាន់ ក៏បានទូរស័ព្ទហៅជនរងគ្រោះឲ្យមកយកលុយ ប៉ុន្តែបែរជាមានទំនាស់ពាក្យសំដីឈានទៅប្រតាយប្រតប់គ្នាបណ្ដាលឲ្យជនរងគ្រោះ ហេង សុខ បែកក្តោងច្រមុះ និងជាំថ្ពាល់ខាងស្តាំ ហើយក៏មានការភ្ញាក់ផ្អើលដល់សមត្ថកិច្ចចុះមកធ្វើការឃាត់ខ្លួនអ្នកទាំងពីរ និងនាំមកទៅសាកសួរនៅប៉ុស្តិ៍នគរបាលទួលសង្កែ តែម្តង។
បច្ចុប្បន្នជនសង្ស័យ រិន បូរ៉ាន់ ត្រូវបានសមត្ថកិច្ចបន្តការសាកសួរបន្ថែមនៅអធិការដ្ឋានខណ្ឌឬស្សីកែវ ដើម្បីរៀបចំឯកសារបញ្ជូនចាត់ការបន្តតាមនីតិវិធី៕ដោយ៖ខេរៈ
(រូបឆ្វេង) រិន បូរ៉ាន់ និងជនរងគ្រោះ ហេង សុខ
