ចិន ៖ អនុរដ្ឋមន្ត្រីក្រសួងការបរទេសចិនលោក Zheng Zeguang បានកោះហៅឯកអគ្គរដ្ឋទូតសហរដ្ឋអាមេរិកប្រចាំនៅទីក្រុងប៉េកាំង លោកស្រី Terry Branstad មកធ្វើការសួរនាំ និងសម្តែងការប្រឆាំងដាច់ខាតពីសំណាក់រដ្ឋាភិបាលចិន ចំពោះសភាអាមេរិក ដែលបានអនុម័នលើច្បាប់ការពារសិទ្ធិមនុស្ស និងប្រជាធិបតេយ្យ ក្នុងទីក្រុងហុងកុងឆ្នាំ២០១៩។ នេះបើយោងតាមសារព័ត៌មានចិន CGTN។
ក្នុងជំនួបនោះផងដែរក្រសួងបានទទូចដល់ភាគីអាមេរិកឲ្យកែប្រែកំហុសរបស់ខ្លួនជាបន្ទាន់និងបញ្ឈប់ការជ្រៀតជ្រែកចូលកិច្ចការហុងកុងដែលជាកិច្ចការផ្ទៃក្នុងរបស់ចិន។ ប្រទេសចិនកំពុងស្ថិតនៅក្នុងការការពារអធិបតេយ្យភាពសន្តិសុខនិងផលប្រយោជន៍អភិវឌ្ឍន៍។ លោកបានបន្ថែមថា រាល់ការប៉ុនប៉ងធ្វើឱ្យអស្ថិរភាពនៅហុងកុងឬធ្វើឱ្យអន្តរាយដល់ភាពរុងរឿងនិងស្ថេរភាពរបស់វានឹងត្រូវបរាជ័យ។
ចិនទទូចដល់សហរដ្ឋអាមេរិកឲ្យទទួលស្គាល់ស្ថានភាពនេះ ហើយតម្រូវឲ្យកែប្រែកំហុសរបស់ខ្លួនជាបន្ទាន់ ទាក់ទងនឹងច្បាប់សិទ្ធិមនុស្សហុងកុង ហើយបញ្ឈប់រាល់ពាក្យសម្តី និងសកម្មភាពណាដែលជ្រៀតជ្រែកចូលកិច្ចការផ្ទៃក្នុងរបស់ចិន។
លោក Zheng Zeguang បានសង្កត់ធ្ងន់ថា“ បើមិនដូច្នោះទេផលវិបាកទាំងអស់ដែលកើតឡើងនៅហុងកុងត្រូវតែជាបន្ទុករបស់សហរដ្ឋអាមេរិកទាំងស្រុង”៕
