អាល់បានី ៖ អាជ្ញាធរមូលដ្ឋានបាននិយាយថា ចំនួនអ្នកស្លាប់ដោយសារការរញ្ជួយដីដែលបានវាយប្រហារប្រទេសអាល់បានី កាលពីព្រឹកថ្ងៃអង្គារបានកើនឡើងដល់ ៤៦ នាក់ហើយនិងជាង៦៥០នាក់រងរបួស។ នេះបើយោងតាមប្រភពពីសារព័ត៌មាន CTGN ។
ក្តីសង្ឃឹមក្នុងការស្វែងរកអ្នកនៅរស់រានមានជីវិតកាន់តែតិចទៅៗ ខណៈដែលប្រតិបត្តិការជួយសង្គ្រោះកំពុងឈានដល់ទីបញ្ចប់ក្នុងរយៈពេល៣ថ្ងៃបន្ទាប់ពីគ្រោះរញ្ជួយដី។ ចំណែកនៅផ្នែកម្ខាងទៀតនៃទីក្រុងប្រជាជនបានចាកចេញពីផ្ទះសម្បែងកំពុងស្វែងរកទីជំរកនៅក្នុងតង់។
គ្រោះរញ្ជួយដីកម្រិត៦.៤រ៉ិចទ័រនិងមានជម្រៅទៅក្នុងដី១០គីឡូម៉ែត្រ បានវាយប្រហារលើរដ្ឋធានី Tirana និងទីក្រុង Durres នៃប្រទេសអាល់បានី កាលពីថ្ងៃអង្គារ ដែលមានមានចំណុចរញ្ជួយស្ថិតនៅចំងាយ៣០គីឡូម៉ែត្រពីរដ្ឋធានី Tirana។
គួរបញ្ជាក់ថា គ្រោះរញ្ជួយដីកម្រិតធ្ងន់ខាងលើ បានកើតឡើងជាលើកទី២នៅក្នុងប្រទេសអាល់បានី នារយៈពេល ២ខែមកនេះ ដោយកាលពីថ្ងៃទី២១ ខែកញ្ញា គ្រោះរញ្ជួយដី៥.៦រ៉ិចទ័រ ក៏ធ្លាប់បានវាយប្រហារលើប្រទេសក្នុងតំបន់ បាល់កង់នេះផងដែរ ជាមួយការបំផ្លាញ និងធ្វើឱ្យខូចខាតផ្ទះជាង៥០០ខ្នង៕
