ខេត្តតាកែវ ៖ ទីតាំងលួចលាក់ផលិតស្ករត្នោតក្លែងក្លាយចំនួន៤ទីតាំងធំៗ នៅក្នុងភូមិព្រៃខ្លា ឃុំ កុមារាជា ស្រុកបាទី ខេត្តតាកែវ ត្រូវបានអាជ្ញាធស្រុកបាទី សហការជាមួយមន្រ្តីជំនាញកាំកុងត្រូល និងមន្ទីរសិប្បកម្មខេត្តតាកែវ ចុះបង្រ្កាបដោយរឹបអូសបានវត្ថុតាងមួយចំនួន យកទៅរក្សាទុកនៅ សាលាស្រុកបាទី ដោយឡែកចំពោះស្ករដែលបានកែច្នៃរួច ហើយត្រូវបានដុតបំផ្លាញចោល។

លោក ភួន ឈីម អភិបាលស្រុកបាទី បានថ្លែងឲ្យដឹងថា បញ្ហាលួចផលិតស្ករត្នោតក្លែងក្លាយ ដោយ យកស្ករ ស លាយជាមួយទឹក និងប្រេងឆា មកកែច្នៃធ្វើជាស្ករត្នោតនេះ កន្លងមកអាជ្ញាធស្រុកបាទី បានកោះហៅម្ចាស់ទីតាំងផលិតទាំងជាង ៤០ទីតាំង នៅក្នុងស្រុកបាទី មកអប់រំ និងបានចុះបង្រ្កាប ជាច្រើនលើកច្រើនសាមកហើយ ប៉ុន្តែបងប្អូនប្រជាពលរដ្ឋមួយចំនួន នៅតែបន្តលួចលាក់ផលិត បើ ទោះបីជាដឹងថា នេះជាទង្វើខុសច្បាប់យ៉ាងណាក្តី ដោយបងប្អូនសំអាងថា គ្មានមុខរបធ្វើក្រៅពីនេះ ដូច្នេះថ្ងៃនេះ អាជ្ញាធរស្រុក រួមនិងមន្រ្តីពាក់ព័ន្ធបានឆ្មក់ចុះមកបង្រ្កាប ដោយរឹបអូសបានវត្ថុតាង មួយចំនួន និងបានដុតបំផ្លាញចោលស្ករឆ្នោតដែលកែច្នៃរួចមួយចំនួនធំ ទៅតាមការបញ្ជារបស់ លោកព្រះរាជអាជ្ញាអមសាលាដំបូងខេត្តតាកែវ។

លោកអភិបាលស្រុកបាទី បានមានប្រសាសន៍ថា ការយកស្ករ ស មកកែច្នៃធ្វើជាស្ករត្នោតហើយ បញ្ជូនទៅដាក់លក់នៅលើទីផ្សារនាពេលកន្លងមកនេះ វាជាទង្វើខុសច្បាប់ ដូច្នេះអាជ្ញាធរស្រុក និង សមត្ថកិច្ចពាក់ព័ន្ធ នឹងបន្តចុះបង្រ្កាប ដោយមិនអនុញ្ញាតឲ្យមានការកែច្នៃ ដោយខុសច្បាប់នេះកើត ឡើងទៀតនោះឡើយ ហើយអ្នកដែលបន្តលួចផលិត បើអាជ្ញាធចាប់ខ្លួនបានលើកក្រោយៗទៀត នឹងត្រូវបញ្ចូនទៅតុលាការដើម្បីចាត់ការទៅតាមច្បាប់ដោយគ្មានយោគយល់ទៀតទេ។

នៅក្នុងឱកាសនោះ លោកអភិបាលស្រុកបាទី ភួន ឈីម បានធ្វើការអំពាវនាវ ឲ្យបងប្អូនប្រជា ពលរដ្ឋដែលលួចលាក់ផលិតស្ករត្នោតក្លែងក្លាយនេះ ឲ្យបញ្ឈប់សកម្មភាពខុសច្បាប់តទៅទៀត ហើយងាកទៅប្រកបមុខរបរផ្សេង ដែលត្រឹមត្រូវទៅតាមច្បាប់ ម្យ៉ាងទៀត ព្រោះការលួចផលិតស្ករ ត្នោតក្លែងក្លាយបែបនេះ មិនត្រឹមតែជាទង្វើខុសច្បាប់ប៉ុណ្ណោះទេ វាក៏បានបំផ្លាញសុខភាពបងប្អូន ប្រជាពលរដ្ឋ ប្រើប្រាស់ ថែមទៀតផង៕