ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជាអនុប្រធានបក្សប្រជាជនកម្ពុជាបានថ្លែងឲ្យដឹងថា គណបក្សកំពុងតែសិក្សាញែកតួនាទី ភារកិច្ចរបស់ក្រុមការងាររាជរដ្ឋាភិបាល និងក្រុមការងារគណបក្សប្រជាជនកម្ពុជា ដែលចុះបម្រើប្រជាពលរដ្ឋនៅតាមមូលដ្ឋាន ដើម្បីឲ្យមានភាពច្បាស់លាស់ ព្រោះការងារមូលដ្ឋានមានសារៈសំខាន់ណាស់។
ការថ្លែងអះអាងរបស់សម្តេចក្រឡាហោម ស ខេង បែបនេះធ្វើឡើងកាលពីព្រឹកថ្ងៃទី០៩ ខែមករា ឆ្នាំ២០២០ ក្នុងឱកាសអញ្ជើញ ជាអធិបតីអបអរសាទរ ខួបលើកទី៤១ នៃទិវាជ័យជម្នះ ៧មករា (១៩៧៩-២០២០) នៅខេត្តបាត់ដំបង។
សម្ដេចក្រឡាហោម ស ខេង បានបញ្ជាក់បន្ថែមថា ការសិក្សាបែងចែកតួនាទីភារកិច្ចនេះ ដើម្បីកំណត់ឲ្យច្បាស់លាស់ថា កិច្ចការងាររបស់គណបក្ស គឺក្រុមការងារបក្សជាអ្នកធ្វើ ហើយអ្វីដែលជាកិច្ចការងាររបស់រាជរដ្ឋាភិបាល គឺប្រគល់ឲ្យក្រុមការងាររបស់រាជរដ្ឋាភិបាល ជាអ្នកអនុវត្ត។ សម្តេចបន្តថា ក្រុមការងាររាជរដ្ឋាភិបាល មានតួនាទីសំខាន់ណាស់ ក្នុងការគាំទ្រដល់រដ្ឋបាលគ្រប់ថ្នាក់ តាំងពីថ្នាក់ខេត្ត រហូតដល់ថ្នាក់ឃុំ ដើម្បីផ្ដល់សេវាសាធារណៈជូនប្រជាពលរដ្ឋ៕
