ចិន ៖ ប្រធានាធិបតីសហរដ្ឋអាមេរិក លោក ដូណាល់ ត្រាំ បាននិយាយថា រដ្ឋបាលរបស់លោក នឹងចាប់ផ្តើមចរចាកិច្ចព្រមព្រៀងពាណិជ្ជកម្មដំណាក់កាលទី ២ រវាងសហរដ្ឋអាមេរិក និងប្រទេសចិន ក្នុងពេលឆាប់ៗនេះ ប៉ុន្តែ លោកអាចនឹងរង់ចាំបញ្ចប់កិច្ចព្រមព្រៀង ណាមួយ រហូតដល់ក្រោយការបោះឆ្នោតប្រធានាធិបតីសហរដ្ឋអាមេរិក នៅខែវិច្ឆិកា។

លោក ត្រាំ បានប្រាប់អ្នកយកព័ត៌មាននៅសេតវិមានថា យើងនឹងចាប់ផ្តើមចរចាភ្លាមៗ ពីកិច្ចព្រមព្រៀងដំណាក់កាលទី ២ ប៉ុន្តែកិច្ចព្រមព្រៀងនេះ នឹងចំណាយពេលយូរបន្តិច ។ ដូច្នេះលោកប្រហែលជាត្រូវរងចាំរហូតដល់ចប់ការបោះឆ្នោតសិន ដោយសារ លោកគិតថា បើចាំដល់ពេលនោះ ទើបប្រទេសទាំងពីរអាចធ្វើកិច្ចព្រមព្រៀងបានប្រសើរជាងមុន ។

គួរបញ្ជាក់ថា កាលពីចុងខែធ្នូរកន្លងទៅ លោក ត្រាំ បាននិយាយថា កិច្ចព្រមព្រៀង ពាណិជ្ជកម្មដំណាក់កាលទី ១ រវាងប្រទេសទាំងពីរ នឹងត្រូវចុះហត្ថលេខានៅថ្ងៃទី ១៥ ខែមករា នេះ នៅសេត្តវិមាន៕