អ៊ីរ៉ង់ ៖ មេបញ្ជាការកងអង្គភាពពិសេស Quds Force ថ្មី របស់កងកម្លាំងឆ្មាំបដិវត្តន៍អ៊ីរ៉ង់ លោក អ៊ីស្មែល កាអានី (Esmail Qaani) បាននិយាយថា សហរដ្ឋអាមេរិកបានសម្លាប់លោក Qassem Soleimani តាមបែប «មនុស្សកំសាកញី» ហើយសន្យាថា នឹងសងសឹកឱ្យវិញ្ញាណក្ខន្ធ អតីតមេបញ្ជាការកងអង្គភាពពិសេសមួយនេះ វិញតាមបែប «កូនប្រុស»។ នេះបើតាមការចេញផ្សាយដោយសារព័ត៌មាន Al Jazeera។
លោក អ៊ីស្មែល កាអានី បាននិយាយថា សហរដ្ឋអាមេរិកបានសម្លាប់លោក សូឡៃមេនី ដោយប្រើប្រាស់វិធីរបស់មនុស្សកំសាក ប៉ុន្តែយើងប្តេជ្ញាថា នឹងសងសឹកចំពោះសត្រូវដែលបានសម្លាប់លោក សូឡៃមេនី តាមបែបមនុស្សក្លាហាន។
សូមជម្រាបថា លោក អ៊ីស្មែល កាអានី ដែលនឹងត្រូវឡើងកាន់មុខតំណែងបន្តពីលោក កាស្សេម សូឡៃមេនី ដែលជាអតីតមេបញ្ជាការកងអង្គភាពពិសេស Quds របស់កងកម្លាំងឆ្មាំបដិវត្តន៍អ៊ីរ៉ង់រូបនេះ គឺជាមនុស្សម្នាក់ដែលស្មោះស្ម័គ្រនឹងលោក សូឡៃមេនី ហើយក៏ត្រូវបានគេជឿជាក់ដែរថា រូបលោកនឹងបន្តដើរតាមជំហាននៃអតីតមេបញ្ជាការអ៊ីរ៉ង់លោក សូឡៃមេនី៕
