ចិន ៖ ចំនួនអ្នកស្លាប់ដោយសារវីរ៉ុសថ្មី ដូចទៅនឹងជំងឺផ្តាសាយ ក្នុងខេត្តហ៊ូប៊ី ប្រទេសចិនបានកើនឡើងដល់១៧នាក់ហើយ ខណៈដែលករណីដែលគេបញ្ជាក់ថា បានឆ្លងវីរ៉ុសក៏មានការកើនឡើងដល់ចំនួន៥៤៤នាក់។ នេះបើយោងតាមសារព័ត៌មាន Channel News Asia។
ការផ្ទុះឡើងនៃវីរុសថ្មីប្រភេទថ្មីនេះ បានចាប់ផ្តើមនៅក្នុងទីក្រុង Wuhan នៃខេត្ត Hubei ជាទីដែលកំពុងមានអ្នកឆ្លងច្រើនជាងគេ ហើយបច្ចុប្បន្នបានរាលដាលដល់ទីក្រុងក៏ដូចជាខេត្តជាច្រើនទៀតរបស់ចិន រួមមានទាំងរដ្ឋធានីប៉េកាំង ទីក្រុងសៀងហៃ ខេត្ត Guandong និងទីក្រុងម៉ាកាវ ហើយនៅក្រៅព្រំដែនប្រទេសចិន គឺនៅប្រទេសថៃ ជប៉ុន កូរ៉េខាងត្បូង តៃវ៉ាន់ និងសហរដ្ឋអាមេរិក ក៏សុទ្ធបានរកឃើញករណីអ្នកមានផ្ទុកវីរុសនេះដែរ ដោយក្នុងនោះថៃមានដល់ទៅ០៤ករណី។
អម្បូរវីរុសខាងលើ គឺ Coronavirus មានប្រភេទវីរុសច្រើន ដែលអាចបង្កជំងឺចាប់ពីកម្រិតស្រាល ដូចជាគ្រុនផ្តាសាយធម្មតាៗរហូតដល់ជំងឺរលាកសួត ឬជំងឺផ្លូវដង្ហើមខ្លាំងក្លាដូចជា ជំងឺ SARS ដ៏កាចសាហាវ៕
