អាមេរិក ៖ ប្រធានាធិបតីអាមេរិកលោក Donald Trump ត្រូវបានលើកលែងទោសនៅក្នុងការចោទប្រកាន់ពីបទរំលោភអំណាចនិងបង្កការរាំងស្ទះ ដល់ការងារស៊ើបអង្កេតរបស់សភា ហើយ បន្ទាប់ពីព្រឹទ្ធសភាសម្រេចចិត្តបោះឆ្នោត មិនទម្លាក់រូបលោកចេញពីតំណែងកាលពីថ្ងៃពុធ។
សម្រាប់ការបោះឆ្នោតសម្រេចនោះសមាជិកព្រឹទ្ធសភាបានបោះឆ្នោត លុបចោលការចោទប្រកាន់ពីបទរំលោភអំណាចក្នុងសំឡេង ៥២ ទល់នឹង ៤៨សំឡេង និងបទចោទប្រកាន់បង្កការរាំងស្ទះ ដល់ការងារស៊ើបអង្កេតរបស់សភាក្នុងសំឡេង ៥៣ ទល់នឹង ៤៧សំឡេង។
តាមរយៈការសម្រេចរបស់ព្រឹទ្ធសភា លោក Trump បានក្លាយជាប្រធានាធិបតីទី ៣ នៅក្នុងប្រវត្តិសាស្ត្រអាមេរិក ដែលគេចផុតពីការដកតំណែងបន្ទាប់ពីលោក ប៊ីល គ្លីនតុន និងលោក អែនឌ្រូ ចនសុន (Andrew Johnson)។
គួរបញ្ជាក់ថា លោក Trump ត្រូវបានសភាតំណាងរាស្ត្រគ្រប់គ្រងដោយគណបក្សប្រជាធិបតេយ្យ ដំណើរការនីតិវិធីដកតំណែងកាលពីខែធ្នូ ឆ្នាំ២០១៩ ជាមួយការចោទ ប្រកាន់ពីបទរំលោភអំណាច និងបង្កការរាំងស្ទះដល់ការងារស៊ើបអង្កេតរបស់សភា ជុំវិញសំណុំរឿងអ៊ុយក្រែន៕
