បារាំង ៖ ប្រធានាធិបតីបារាំងលោក Emmanuel Macron បាននិយាយនៅក្នុងសុន្ទរកថាតាមទូរទស្សន៍មួយថាការផ្ទុះឡើងនៃជំងឺកូរ៉ូណានេះគឺជាវិបត្តិសុខភាពសាធារណៈដ៏អាក្រក់បំផុតរបស់ប្រទេសក្នុងរយៈពេលមួយសតវត្សរ៍នេះ។ នេះបើយោងតាមប្រភពពី CGTN ។
ជាមួយគ្នានោះដែរដើម្បីទប់ស្កាត់ជំងឺឆ្លងនេះលោក Macron ក៏បានប្រកាសបិទសាលារៀន និងក្លិបកំសាន្តនៅក្នុងប្រទេស និងត្រៀមធ្វើការជាមួយដៃគូអឺរ៉ុបលើកញ្ចប់ដ៏សំខាន់មួយដើម្បីធ្វើឱ្យសេដ្ឋកិច្ចងើបឡើងវិញ។ ទោះយ៉ាងណាលោក Macron បាននិយាយថា ការបោះឆ្នោតក្រុងដែលគ្រោងធ្វើនៅចុងសប្តាហ៍នេះនឹងដំណើរការទៅមុខបន្ទាប់ពីមានការណែនាំពីអ្នកឯកទេសសុខភាពសាធារណៈ។
យ៉ាងណាមិញបើយោងតាមក្រសួងសុខាភិបាលបារាំងបាននិយាយថា ចំនួនអ្នកស្លាប់នៅក្នុងប្រទេសបារាំងបានកើនឡើងដល់៦១នាក់ ខណៈករណីឆ្លងវីរុសនេះបានកើនឡើងដល់ ២.៨៧៦នាក់ក្នុងនោះមានមនុស្សចំនួន១២៩ នាក់ស្ថិតក្នុងស្ថានភាពធ្ងន់ធ្ងរ និងគំរាមកំហែងដល់អាយុជីវិត៕
