ភ្នំពេញ៖ នៅថ្ងៃទី១៧ ខែកក្កដា នេះ ស្ត្រីខ្មែរ៣នាក់ទៀតដែលចាញ់បោកមេខ្យល់ទៅរៀបការជាមួយបុរសចិន នៅប្រទេសចិន នឹងត្រូវអាជ្ញាធរកម្ពុជា សហការជាមួយសមត្ថកិច្ចចិន ជួយសង្គ្រោះ និងបញ្ជូនមកកម្ពុជាវិញ ។
ប្រភពព័ត៌មានបានរាយការណ៍ឲ្យដឹងថា ស្ត្រីខ្មែរ៣នាក់ទៀតហើយ ដែលត្រូវស្ថានអគ្គកុងស៊ុលកម្ពុជា ប្រចាំនៅទីក្រុងក្វាងចូវប្រទេសចិនជួយសង្គ្រោះ បន្ទាប់ពីពួកគេបានរងការចាញ់បោករបស់មេខ្យល់នាំទៅរៀបការជាមួយបុរសជនជាតិចិន នៅខេត្តហ្វ៊ូជាន ប្រទេសចិន ។
អ្នកនាំពាក្យក្រសួងការបរទេសកម្ពុជាលោក ជុំ សុន្ទរី បានថ្លែងកាលពីរសៀលថ្ងៃទី១៦កក្កដា នេះឲ្យដឹងថា ស្ថានអគ្គកុងស៊ុលកម្ពុជា ប្រចាំនៅទីក្រុងក្វាងចូវប្រទេសចិន បានសហការជាមួយអាជ្ញាធរចិន ជួយសង្គ្រោះនារីខ្មែរទាំងបីនាក់នោះ មានឈ្មោះ ទី១-ពេជ្រ សំអាត មានស្រុកកំណើត នៅភូមិអូអន្លក់ ឃុំតាសែន ស្រុកគំរៀង ខេត្តបាត់ដំបង។ ទី២-ឈ្មោះ រិន កញ្ញា មានស្រុកកំណើត នៅភូមិជ្រួញស្នែងក្របីលើ ឃុំកំពង់គ ស្រុក ព្រែកប្រសព្វ ខេត្តក្រចេះ។ ទី៣-ឈ្មោះ ខុម ខាន់ មានស្រុកកំណើត នៅឃុំវិហារសួគ៌ ស្រុកវិហារសួគ៌ ខេត្តកណ្ដាល ។
លោក ជុំ សុន្ទរី បានបញ្ជាក់ថា ស្ថានអគ្គកុងស៊ុល នឹងបញ្ជូននារីរងគ្រោះទាំងបីខាងលើឲ្យត្រឡប់មកកម្ពុជាវិញ នៅថ្ងៃទី១៧ ខែកក្កដា ឆ្នាំ២០១៥ តាមជើងយន្តហោះ K6659 វេលាម៉ោង០៣:០០នាទីរសៀល នៅអាកាសយានដ្ឋានអន្តរជាតិ ទីក្រុងសៀមរាប៕
