ភ្នំពេញ៖នាង ឯក សុជាតា ហៅសាសា នៅព្រឹកថ្ងៃទី១៧នេះ បានប្រកាសបញ្ជាក់ជំហរថារឿងក្ដីដែលនាងប្ដឹងផ្ដល់លោក សុខ ប៊ុន គឺពុំមានទារសំណងអ្វីមួយរៀលឡើយ សូម្បីតែការពិភាក្សាជាមួយក្រុមគ្រួសារថាត្រូវទារប៉ុន្មាននោះក៏ គ្មានដែរ គឺសូមស្នើឱ្យតុលាការផ្តន្ទាទោស លោក សុខ ប៊ុន ទៅតាមផ្លូវច្បាប់ តែប៉ុណ្ណោះ ។
នាង សាសា បានធ្វើសន្និសីទកាសែតខ្លីមួយ ជាមួយអ្នកកាសែតនៅមុខសាលាដំបូងរាជធានីភ្នំពេញ នៅវេលាម៉ោង១០:៥៥នាទី ថ្ងៃទី១៧ ខែកក្កដា ឆ្នាំ២០១៥នេះ បន្ចាប់ពីតុលាការបានបញ្ចប់ការសាកសួរយកចម្លើយ តុលាការ ។
ប្រភពព័ត៌មានក្រៅរបងតុលាការបានបង្ហើបឲ្យដឹងថា ប៉ុន្មានថ្ងៃចុង ក្រោយនេះ មានលោកឧត្តមសេនីយ៍ផ្កាយ២ម្នាក់បានលួចរត់ការសំណុំរឿង បណ្តឹងឧកញ៉ា សុខ ប៊ុន ដោយស្ងាត់ៗ ។មជ្ឈដ្ឋានខ្លះបានគិតថា ទំនងជាមានលោកផ្កាយ២នោះរត់ការមែន ទើបថ្ងៃនេះ នាងសាសា ប្រកាស នៅចពោះមុខអ្នកកាសែតមុខខ្លោងទ្វារតុលាការថា ក្នុងបណ្តឹង របស់នាង ៗមិនទាមទារប្រាក់មួយរៀលទេ ផ្ទុយពីប៉ុន្មានថ្ងៃមុនដែលនាង ប្រកាសទារសំណងចំនួន៥លានដុល្លារ។
សាសា បានបញ្ជាក់ទៀតថា កញ្ញានឹងចេញទៅព្យាបាលរបួសនៅក្រៅប្រទេសទៀត ដោយសារការវាយតប់ពីសំណាក់លោក សុខ ប៊ុននោះ បណ្ដាលឲ្យភ្នែកមួយចំនួនទៀត មើលមិនសូវឃើញច្បាស់នោះទេ និងហ៊ឹងត្រចៀកមួយចំហៀងទៀតផង ៕
