ខេត្តព្រះវិហារ ៖ សត្វត្រយ៉ងមួយហ្វូង ដែលជាសត្វត្រូវបានចុះបញ្ជីជាប្រភេទដ៏កម្រស្ទើរតែផុតពូជ នៅកម្ពុជា ដោយគេគិតថា មនុស្សជំនាន់ក្រោយអាចលែងបានឃើញ បានឮត្រឹមតែឈ្មោះប៉ុណ្ណោះ ស្រាប់តែពេលនេះ ពួកវាបានបង្ហាញវត្តមានប្រមាណជាង ២០០ក្បាលក្នុងទំនប់ទឹកអូស្វាយ ឬហៅថា ទំនប់ទឹកស្រះក្តុល ដែលទីតាំងទំនប់ទឹកខាងលើនេះ ស្ថិតនៅភូមិធម្មជាតិសម្តេចតេជោ ឃុំស្រអែម ស្រុកជាំក្សន្ត ខេត្តព្រះវិហារ។

បើតាមកាបញ្ជាក់ពីលោក ប្រាក់ ភី មេឃុំស្រអែម បានអោយដឹងនៅព្រឹកថ្ងៃទី១ ខែមេសា ឆ្នាំ២០២០ នេះថា រូបលោកផ្ទាល់ គឺលោកមិនដែលបានស្គាល់ប្រភេទសត្វត្រយ៉ងនោះទេ ដែលកាលពីមុនពួកវា ក៏មិនដែលមានវត្តមាននៅក្នុងទំនប់ទឹកខាងលើនោះដែរ។

លោកមេឃុំ បានបញ្ជាក់បន្ថែមថា សត្វដែលកម្រៗ ដូចជា ប្រភេទសត្វទាទឹក នោះវិញ បច្ចុប្បន្នក៏មានវត្តមានក្នុងទំនប់ទឹកខាងលើនេះដែរ ។លោក ក៏បានអំពាវនាវដល់ប្រជាសហគមន៏ ដែលរស់នៅក្នុងតំបន់ខាងលើ ធ្វើយ៉ាងណាមេត្តាជួយអភិរក្សសត្វដ៍កម្រនេះ ដើម្បីជាកាទាក់ទាញភ្លៀវទេសចរ ដែលបានអញ្ជើញមកទស្សនាប្រាសាទព្រះវិហារ ហើយលោកក៏អាចអញ្ជើញភ្ញៀវឲ្យឈាងចូលទៅមើលហ្វូងសត្វដ៏កម្រនេះបានផងដែរ។

ដោយឡែកលោក គង់ វិបុល ប្រធានមន្ទីរទេសចរណ៏ ខេត្តព្រះវិហារ បានលើកឡើងថា ប៉ុន្មានថ្ងៃមុននេះ លោកបានទទួលបានព័ត៌មានពាក់ពន្វ័នឹងសត្វត្រយ៉ងនេះដែរ ហើយលោក ក៏បានចាត់អោយ មគ្គទេសក៍ របស់លោក ចុះទៅពិនិត្យនឹងធ្វើកាស្រាវជ្រាវលើពពួកសត្វទាំងនេះ ដើម្បីរកវិធានការណាមួយ ជួយអោយសត្វដ៏កម្រទាំងនេះ រស់នៅបានក្នុងទំនប់ខាងលើជាអចិន្ត្រៃយ៍។

លោកសំណូមពរដល់ប្រជាសហគមន៍ក៏ដូចអាជ្ញាធរពាក់ពន្វ័ទាំងអស់ ចូលរួមសហការ ដោយទី១ គឺមិនត្រូវកាប់ដើមឈើ ដែលនៅជិតតំបន់ខាងលើនោះជាដាច់ខាត។

ទី2 មិនត្រូវបរបាញ់ ឬក៏ដាក់ថ្នាំបំពុល ឬក៏រូបភាពផ្សេងៗដែលធ្វើឲ្យមានផលប៉ះពាល់រំខានដល់ការស់នៅរបស់សត្វទាំងនោះៗឡើយ។

លោកប្រធានមន្ទីរបានបញ្ជាក់ទៀតថា នេះជាមោទនភាពមួយ ដែលតំបន់នេះ នៅជិតតំបន់ប្រាសាទព្រះវិហារ ហើយលោកនឹងរៀបចំគំរោងស្នើសុំអាជ្ញាធរប្រាសាទព្រះវិហារ ដើម្បីសហកាជាមួយអាជ្ញាធរដែនដី ចូលរួមសហកាជាមួយមន្ទីរទេសចរណ៍ខេត្ត បង្កើតតំបន់ខាងលើនេះទៅជាតំបន់ទេសចរណ៍បែបធម្មជាតិសម្រាប់ភ្ញៀវជាតិ និងអន្តរជាតិ ចូលមកលេងកំសាន្តទៅថ្ងៃអនាគតឲ្យបានកាន់តែច្រើនថែមទៀត៕ ដោយ ៖ កូវ ប៊ុនហេង