ញូយ៉ក ៖ ក្នុងរយៈពេល ២៤ម៉ោងអ្នកជំងឺសរុប ២,៧៥១នាក់ទៀតបានបាត់បង់ជីវិត ដែលនាំឲ្យចំនួនមនុស្សស្លាប់ ដោយសារតែជំងឺ COVID-19 សរុបនៅទូទាំងសហរដ្ឋអាមេរិកកើនឡើងដល់ ៤៤,៨៤៥នាក់។ នេះបើយោងតាមទិន្នន័យពីសាកលវិទ្យាសាស្ត្រអាមេរិក ចន ហប់ឃីនស៍ (Johns Hopkins University) ដែលដកស្រង់ចេញផ្សាយដោយទីភ្នាក់ងារព័ត៌មានចិនស៊ីនហួរ នៅព្រឹកថ្ងៃពុធ ទី២២ ខែមេសា ឆ្នាំ២០២០នេះ។
ប្រភពដដែលបានបង្ហាញឲ្យឃើញទៀតថា នៅក្នុងរយៈពេល ២៤ម៉ោងប៉ុណ្ណោះ (គិតត្រឹមម៉ោង ៨៖០០នាទីយប់ថ្ងៃអង្គារ ទី២១ ខែមេសា ឆ្នាំ២០២០ ម៉ោងនៅរដ្ឋធានីវ៉ាស៊ីនតោន) សហរដ្ឋអាមេរិកបានរកឃើញអ្នកឆ្លងជំងឺ COVID-19 ចំនួន ៣៩,៤៦៩ករណីថ្មីទៀត ដែលនាំឲ្យចំនួនសរុបកើនឡើងដល់ ៨២៣,៧៨៦ករណី។
បើពិនិត្យមើលទៅលើតួលេខមនុស្សស្លាប់ ដែលត្រូវបានរាយការណ៍កាលពីថ្ងៃអង្គារនោះ គឺវាច្រើនជាងជិត ២ដង បើធៀបនឹងតួលេខមួយថ្ងៃមុនទៀត ដោយកាលពីថ្ងៃចន្ទ សហរដ្ឋអាមេរិកបានរាយការណ៍ថា មនុស្សសរុប ១,៤៣៣នាក់បានស្លាប់ ក្នុងពេលតែ ២៤ម៉ោងដោយសារជំងឺ COVID-19 ដ៏កាចសាហាវ៕
