ភ្នំពេញ ៖ យោងតាមការចុះផ្សាររបស់កាសែត The Nation របស់ប្រទេសថៃ បានដាក់ប្រទេសចំនួន៥ក្នុងនោះ ក៏មានកម្ពុជាផងដែរ ជាប្រទេសដែលមានហានិភ័យខ្ពស់នៃការឆ្លងរាលដាលជំងឺកូវីដ ១៩ខ្ពស់ ។ប្រទេសទាំងបួននោះ រួមមានកម្ពុជា ម៉ាឡេស៊ី ឡាវ ឥណ្ឌូនេស៊ី និងប្រទេសមីយ៉ាន់ម៉ា ។
ការចុះផ្សាយរបស់កាសែត The Nation នេះ គឺយោងទៅតាមគេហទំព័រ Royal Gazette ហើយក្រសួងសុខាភិបាលថៃ ក៏បានចុះហត្ថលេខាទទួលស្គាល់ថាដូច្នោះដែរ ។
សូមរំលឹកថាកាលពី ថ្ងៃទី ៦ ខែមីនាកន្លងទៅ ប្រទេសថៃក៏បានដាក់ឈ្មោះប្រទេសចំនួន ៤ គឺចិន (រួមមានហុងកុងនិងម៉ាកាវ) កូរ៉េខាងត្បូងអ៊ីតាលីនិងអ៊ីរ៉ង់ដែលជាហានិភ័យខ្ពស់នៃការឆ្លងមេរោគ Covid-19 ដែរ ។
គិតត្រឹមថ្ងៃទី ២៤ ខែមេសា ២០២០ នេះ ថៃ មានអ្នកមានឆ្លងមេរោគកូវីដ ១៩ ចំនួន ២.៨៣៩នាក់ មានអ្នកស្លាប់ ៥០នាក់ ប្រទេសឥណ្ឌូនេស៊ី មានអ្នកឆ្លងមេរោគនេះ ចំនួន ៧.៧៧៥នាក់ មានអ្នកស្លាប់៦៤៧នាក់ ប្រទេសម៉ាឡេស៊ីមានអ្នកឆ្លង ៥.៦០៣នាក់ ក្នុងនោះអ្នកស្លាប់មាន៩៥នាក់ ប្រទេសមីយ៉ាន់ម៉ា មានអ្នកឆ្លង១៣២នាក់ មានអ្នកស្លាប់៥នាក់ និងប្រទេសកម្ពុជា ដែលកាសែតថៃ បានចាត់ទុកថាជាប្រទេសមានហានីភ័យខ្ពស់ឆ្លងខ្ពស់មានអ្នកឆ្លងជំងឺនេះ ចំនួន ១២២នាក់ និងមិនទាន់មានអ្នកស្លាប់នៅឡើយ ៕
