កំពង់ឆ្នាំង៖ មន្ត្រីនគរបាលឋានៈនាយ ការិយាល័យព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តកំពង់ឆ្នាំងម្នាក់ បានធ្វើអត្តឃាតបាញ់ដោយកាំភ្លើងសម្លាប់ខ្លួនឯង កាលពីវេលាម៉ោង០៥:៤០ នាទីល្ងាចថ្ងៃទី២៦ ខែកក្កដា នេះ នៅស្នងការដ្ឋាននគរបាលខេត្តកំពង់ឆ្នាំង ស្ថិតនៅក្នុងភូមិកណ្តាល សង្កាត់កំពង់ឆ្នាំ ក្រុងកំពង់ឆ្នាំង។
នាយការិយាល័យរូបនេះមានឈ្មោះ ទេព សារ៉ាត់ អាយុ៤៨ឆ្នាំ ឋានៈវរសេនីយ៍ត្រី មានទីលំនៅភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។
សេចក្ដីរាយការណ៍បានឲ្យដឹងថា តាមការសន្និដ្ឋានរបស់សមត្ថកិច្ចជនរងគ្រោះ បាញ់សម្លាប់ខ្លួនឯងនេះតាំងពីម៉ោង១១ៈ៣០នាទីមកម្ល៉េះ ដោយ ប្រើប្រាស់កាំភ្លើងខ្លីម៉ាកកា៥៩ បាញ់ពីគុម្ពត្រចៀកខាងស្តាំធ្លាយមកថ្ងាស បណ្តាលឲ្យស្លាប់នៅលើប៉ៅអីុនៅក្នុងបន្ទប់ស្នាក់នៅរបស់គាត់នៅ ក្នុងស្នងការដ្ឋាន។ហើយនៅលើក្បាលដំណេក ទេព សារ៉ាត់ មានបន្សល់ទុកនូវលិខិតសុំទោសយ៉ាងខ្លីមួយច្បាប់ថា សុំទោសលោកជំទាវប្រធានក្រុមប្រឹក្សាខេត្ត ឯកឧត្ដមអភិបាលខេត្តកំពង់ឆ្នាំង និងលោកស្នងការនគរបាលខេត្តកំពង់ស្ពឺ។
សេចក្ដីរាយការណ៍បន្តទៀតថា មូលហេតុ ដែលនាយការិយាល័យធ្វើអត្តឃាតនេះ ដោយសារមានទំនាស់ជាមួយស្រីស្នេហ៍របស់ខ្លួនម្នាក់ ដោយស្រីកំណាន់របស់លោកលួចទៅមានប្រុសថ្មី នាំឲ្យជនរងគ្រោះ ខឹងនៅបានប្រើអំពើ ហិង្សាទះស្រីស្នេហ៍ ២-៣កំផ្លៀង នាំឲ្រនារីម្នាក់នោះ ខឹងនឹងបានដាក់ពាក្យបណ្តឹង ប្តឹងប្រើអំពើហិង្សា ដោយទាមទារជំងឺចិត្តចំនួន ២០លានរៀល កាលពីថ្ងៃទី២៤ ខែកក្កដា ឆ្នាំ២០១៥ ទើបឈានដល់ការសម្រេច ចិត្តបាញ់សម្លាប់ខ្លួនឯងតែម្តង។
ស្ត្រីកំណាន់របស់លោក ដែលជាស្ត្រីមេម៉ាយកូន៣នោះ មានឈ្មោះ ឌុក ឌីឡុម អាយុ៤២ឆ្នាំ រស់នៅភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង។ បច្ចុប្បន្នស្នាក់នៅភូមិប្អេរ សង្កាត់ប្អេរ ក្រុងកំពង់ឆ្នាំង៕
