ប៉េកាំង ៖ លោក ស៊ី ជិនពីង ប្រធានាធិបតីបានសន្យាថា ចិននឹងផលិតវ៉ាក់សាំងប្រឆាំងវីរុសកូរ៉ូណាហើយចែកចាយនៅទូទាំងពិភពលោក ខណៈដែលការថ្លែងនេះ ធ្វើឡើងក្នុងកិច្ចប្រជុំសភារបស់អង្គការសុខភាពពិភពលោក តាមរយៈវីដេអូពីចម្ងាយ កាលពីថ្ងៃទី១៨ ខែឧសភា ឆ្នាំ២០២០។ នេះបើយោងតាមសារព័ត៌មាន Bloomberg។
លោកបញ្ជាក់យ៉ាងដូច្នេះថា៖ «ការអភិវឌ្ឍវ៉ាក់សាំងការពារជំងឺកូវីដ១៩ នៅពេលដែលផលិតរួចប្រើប្រាស់បាន នោះវានឹងក្លាយជាវ៉ាក់សាំងសាធារណៈសកល។ វានឹងក្លាយជាការរួមចំណែករបស់ចិន ក្នុងការធានានូវវ៉ាក់សាំងដែលអាចលៃលកប្រើប្រាស់បានក្នុងបណ្តាប្រទេសកំពុងអភិវឌ្ឍ»។
ជាមួយគ្នានេះ លោក ស៊ី ជិនពីង ក៏បានជំរុញឱ្យបង្កើនកិច្ចសហប្រតិបត្តិការអន្តរជាតិក្នុងការប្រយុទ្ធនឹងជំងឺរាតត្បាត។ លោកបញ្ជាក់ដែរថា ចិនគាំទ្រអង្គការ WHO ពេញទំហឹង ហើយនឹងផ្តល់ជំនួយ ២ពាន់លានដុល្លារ ក្នុងរយៈពេល២ឆ្នាំ ដើម្បីគាំទ្រដល់ការប្រយុទ្ធនឹងជំងឺនេះ៕
