បរទេស ៖ យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា គិតត្រឹមម៉ោង ៧ព្រឹកថ្ងៃសៅរ៍ ទី០៦ ខែមិថុនា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ៦,៨២៦,៩៣៧នាក់ហើយ។ ក្នុងនោះអ្នកស្លាប់មានចំនួន ៣៩៧,៤៣៣នាក់ និងជាសះស្បើយឡើងវិញ ៣,៣១២,៩២៤នាក់។

គេហទំព័រដដែលបានបង្ហាញទៀតថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើនដដែល ខណៈដែលសហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដោយមានអ្នកឆ្លងជំងឺ COVID-19 ចំនួន ១,៩៥៣,៤១៩នាក់ ស្លាប់ចំនួន ១១១,៣៨១នាក់ និងជាសះស្បើយចំនួន ៧១៩,៥១៣នាក់។

ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩នោះ គឺប្រទេសប្រេស៊ីល។ ប្រេស៊ីលមានអ្នកឆ្លង ៦៤៥,៨២៦នាក់ ស្លាប់ចំនួន ៣៥,០៤០នាក់ និងជាសះស្បើយ ២៨៨,៦៥២នាក់។

ប្រទេសឈរនៅចំណាត់ថ្នាក់ទី៣ គឺប្រទេសរុស្ស៉ី។ រុស្ស៉ី មានអ្នកឆ្លង ៤៤៩,៨៣៤នាក់ ស្លាប់ ៥,៥២៨នាក់ និងជាសះស្បើយ ២១២,៦៨០នាក់៕