ភ្នំពេញ៖ លោក រៀល ខេមរិន្ទ្រ តំណាង រាស្ត្រគណបក្សសង្គ្រោះជាតិមណ្ឌលខេត្តស្វាយរៀងបានបំភ្លឺ ទៅអង្គភាពប្រឆាំងអំពើពុករលួយ (អ.ប.ព) វិញថា លោកបានទទួលប្រាក់ពីសប្បុជនទាំងក្នុងស្រុក និងនៅឯនាយសមុទ្រមានចំនួនសរុប ២០៧៥០ដុល្លារសហរដ្ឋ អាមេរិក ដើម្បីចុះទៅពិនិត្យព្រំដែនកាលពីថ្ងៃទី១៩ខែកក្កដា។
លោក រៀល ខេមរិន្ទ្រ បកស្រាយបែបនេះបន្ចាប់ពី លោកទេសរដ្ឋមន្ត្រី ឱម យ៉ិនទៀង ប្រធាន អ.ប.ព បានសរសេរលិខិតមួយច្បាប់ ស្វែងរកការឆ្លើយបំភ្លឺពីលោក ពាក់ព័ន្ធនឹងការចោទប្រកាន់ថា លោក រៀល ខេមរិន្ទ្រ បានកេងប្រវ័ញ្ចយកប្រាក់ជាច្រើនម៉ឺនដុល្លារសហរដ្ឋ អាមេរិកពីការដែលរៀបចំដំណើរទៅពិនិត្យព្រំដែនកម្ពុជាវៀតណាម។
លិខិតរបស់លោក រៀល ខេមរិន្ទ្រ ដែលចេញផ្សាយនៅថ្ងៃទី១៣ខែសីហា និងដាក់ជូនទៅប្រធានអ.ប.ព បញ្ជាក់ថា ថវិកាដែលលោក បានទទួលពីសប្បុជនទាំងក្នុងស្រុក និងនៅឯនាយសមុទ្រមានចំនួនសរុប២០៧៥០ដុល្លារ សហរដ្ឋ អាមេរិក ដើម្បីចុះទៅពិនិត្យព្រំដែនកាលពីថ្ងៃទី១៩ខែកក្កដា។ លោកបន្តថា ថវិកាទាំងនោះត្រូវបានចំណាយលើការជួលរថយន្ត ការទិញទង់ជាតិ ទង់សាសនា និងសម្ភារផ្សេងៗ ព្រមទាំងម្ហូបអាហារនិងទឹកសុទ្ធជាដើម។
លោកបានបញ្ជាក់ថា រាល់ការទទួល ការគ្រប់គ្រងនិងការចាត់ចែងថវិកាទាំងអស់នោះ មានក្រុមការងារតាមផែននីមួយៗជាអ្នកទទួលបន្ទុកនិងទទួលខុសត្រូវ ប្រកបដោយតម្លាភាព។
គួរបញ្ជាក់ថា តំណាងរាស្ត្រមណ្ឌលខេត្តស្វាយរៀង លោករៀល ខេមរិន្ទ្រ ត្រូវបានអង្គភាពប្រឆាំងអំពើពុករលួយ ចេញលិខិតឲ្យមកចូលបំភ្លឺ លើពាក្យបណ្ដឹងចោទប្រកាន់លើរូបលោកថា បានកេងប្រវ័ញ្ចប្រាក់ជាច្រើនម៉ឺនដុល្លារអាមេរិក ពេលដែលលោកបានរៀចំដំណើរទៅព្រំដែន កម្ពុជា-វៀតណាម នៅខេត្តស្វាយរៀល។
ក្នុងលិខិតរបស់អ.ប.ព ចេញផ្សាយនៅថ្ងៃទី៣១ កក្កដា កន្លងទៅបានឲ្យដឹងថា អង្គភាពបានទទួលពាក្យបណ្ដឹងចំនួនបី ដែលក្នុងនោះបណ្ដឹងទី១ បានឲ្យដឹងថា មានទឹកប្រាក់ចំនួន១ម៉ឺន ៥ពាន់ដុល្លារ, ពាក្យបណ្ដឹងទី២ មានទឹកប្រាក់ចំនួន ២ម៉ឺនដុល្លារ និងពាក្យបណ្ដឹងទី៣ មានចំនួន ២ម៉ឺនដុល្លារ។ សរុបពាក្យបណ្ដឹងទាំងបីនេះ មានចំនួន ៥ម៉ឺន៥ពាន់ដុល្លារសហរដ្ឋ អាមេរិក ។
អង្គភាពប្រឆាំងអំពើពុករលួយ បានប្រាប់ឲ្យលោករៀល ខេមរិន្ទ្រ ធ្វើការបំភ្លឺដោយភ្ជាប់ជាមួយនូវឯកសារនានាសម្រាប់បញ្ជាក់ ដើម្បីអង្គភាពប្រឆាំងអំពើពុករលួយធ្វើការវាយតម្លៃ មុននឹងសម្រេចបន្តនីតិវិធីរបស់ខ្លួន៕
