បរទេស ៖ យោងតាមទិន្នន័យពីគេហទំព័រអន្តរជាតិ Worldometer បានបង្ហាញថា គិតត្រឹមម៉ោង ៧ព្រឹកថ្ងៃសុក្រ ទី០៧ ខែសីហា ឆ្នាំ២០២០នេះ ចំនួនអ្នកឆ្លងជំងឺ COVID-19 នៅទូទាំងពិភពលោក បានកើនឡើងដល់ ១៩,២៣៣,៨៦៧នាក់ហើយ។ ក្នុងនោះអ្នកស្លាប់មានចំនួន ៧១៦,៤៥៧ នាក់ និងជាសះស្បើយឡើងវិញ ១២,៣៤៥,០៦៦នាក់។

គេហទំព័រដដែលបង្ហាញថា ការរីករាលដាលនៃជំងឺកូវីដ១៩ នៅតែមានសភាពស្រួចស្រាវចំនួនអ្នកឆ្លង និងស្លាប់ថ្មីនៅតែមានចំនួនច្រើន។ ក្នុងនោះសហរដ្ឋអាមេរិក នៅតែជាប្រទេសមានចំនួនអ្នកឆ្លង និងស្លាប់ដោយសារជំងឺ COVID-19 ច្រើនជាងគេ ដែលមានអ្នកឆ្លងជំងឺ COVID-19 ចំនួន ៥,០២៨,៧៩១នាក់ ស្លាប់ចំនួន ១៦២,៧២៦នាក់ និងជាសះស្បើយចំនួន ២,៥៧៥,៨២១នាក់។

ដោយឡែកប្រទេសដែលឈរនៅចំណាត់ថ្នាក់ទី២ នៃតារាងស្ថិតិនៃអ្នកឆ្លងជំងឺកូវីដ១៩ គឺប្រទេសប្រេស៊ីល មានអ្នកឆ្លង ២,៩១៧,៥៦២នាក់ ស្លាប់ចំនួន ៩៨,៦៤៤នាក់ និងជាសះស្បើយ ២,០៤៧,៦៦០នាក់ និងប្រទេសឈរនៅចំណាត់ថ្នាក់ទី៣ គឺប្រទេសឥណ្ឌា មានអ្នកឆ្លង ២,០២៥,៤០៩នាក់ ស្លាប់ ៤១,៦៣៨នាក់ និងជាសះស្បើយ ១,៣៧៧,៣៨៤នាក់៕