អគារក្លឹបកម្សាន្តស្កាយផប (Sky Pop) នៅតាមផ្លូវ២០០៤ ភូមិត្រពាំងល្វា សង្កាត់កាកាប ខណ្ឌពោធិសែនជ័យ រាជធានីភ្នំពេញ នៅវេលាម៉ោងជាង ៩ យប់ថ្ងៃទី១៨ ខែកញ្ញា ឆ្នាំ២០១៥ នេះ ត្រូវភ្លើងឆាបឆេះយ៉ាងខ្លាំង។
ប្រធានការិយាល័យនគរបាលបង្ការ និងពន្លត់អគ្គីភ័យ នៃស្នងការដ្ឋាននគរបាលរាជធានីភ្នំពេញ លោក នេត វន្ថា ឲ្យដឹងថា នៅមិនទាន់ដឹងថា មានមនុស្សរបួសឬស្លាប់ក្នុងហេតុ ការណ៍នោះនៅឡើយទេ។
លោកបន្តថា មូលហេតុបណ្ដាលឲ្យឆេះបណ្តាលមកពីឆ្លងចរន្តអគ្គិសនីកើតចេញពីបន្ទប់ខារ៉ាអូខេ១ ក្នុងចំណោម១០បន្ទប់ដែលភ្ញៀវកំពុងច្រៀង។
ប្រភពផ្សេងទៀតបានប្រាប់ថា ភ្លើងដែលឆាបឆេះអគារក្លិបខារ៉ាអូខេ ស្កាយផប នេះ គឺផ្តើមចេញពីកន្លែងចម្អិនម្ហូបអាហារ។
ទោះជាយ៉ាងនេះក្តី នៅខាងក្រៅអគារពុំទាន់ឃើញមានអ្នករបួសណាម្នាក់ត្រូវឡានពេទ្យដឹកចេញនៅឡើយទេ ដែលគេគិតថា ទំនងជាគ្មានមនុស្សរងគ្រោះក្នុងហេតុការណ៍នេះទេ។
រហូតដល់ម៉ោងប្រមាណ១០ អគ្គីភ័យបានរលត់ហើយ បន្ទាប់ពីសមត្ថកិច្ចប្រើប្រាស់ឡាន ទឹកបាញ់ពន្លត់អស់ជាច្រើនគ្រឿង។សមត្ថកិច្ចមិនទាន់ចេញរបាយការណ៍ពីទំហំនៃការខូចខានៅឡើយទេ៕ដោយ៖រដ្ឋា ; រាយការណ៍បន្ថែម៖បញ្ញា
