កំពង់ធំ៖ស្ត្រីម្នាក់បានប្រកាច់ស្លាប់ ខណៈវេជ្ជបណ្ឌិតវ័យក្មេងជាម្ចាស់គ្លីនិកតាមភូមិម្នាក់យីហោ «ហ៊រ ម៊ី» បានចាក់ថ្នាំ និងព្យួរសេរ៉ូមអស់ជាងមួយប្លោក កាលពីថ្ងៃទី២៥ ខែកញ្ញា ឆ្នាំ២០១៥ កន្លងមកនេះ នៅជិតផ្សាស្ទោង ស្ថិតក្នុងភូមិកំពង់ក្តី ឃុំកំពង់ចិនត្បូង ស្រុកស្ទោង ខេត្តកំពង់ធំ។
ប្រភពព័ត៌មានបានរាយការណ៍ថា វេជ្ជបណ្ឌិតវ័យក្មេងជាម្ចាស់គ្លីនិកខាងលើបានជំរុញឲ្យគេបញ្ជូនទៅកាន់មន្ទីរពេទ្យបង្អែកស្រុកស្ទោង ហើយខ្លួនបានរត់គេចខ្លួនបាត់ភ្លាមៗ បន្ទាប់ពីដឹងថា ការចាក់ថ្នាំនិង ចាក់សេរ៉ួម ដល់ស្ត្រីជាអ្នកជំងឺម្នាក់នោះ បណ្តាលឲ្យប្រកាច់ដាច់ខ្យល់ស្លាប់ ។
មន្ត្រីនគរបាលស្រុកស្ទោងបានបញ្ជាក់ថា វេជ្ជបណ្ឌិតនោះឈ្មោះ អាំង ពិទូ អាយុ២៩ឆ្នាំ រស់នៅភូមិកើតហតុខាងលើ មានប្រពន្ធជាឧសថការីជាអ្នកលក់ថ្នាំពេទ្យ ហើយប្តីជាវេជ្ជបណ្ឌិតបើកព្យាបាលជំងឺនៅទីនោះ។
ប្រភពដដែលបន្តថា ការបើកគ្លីនិកព្យាបាលជំងឺខាងលើនេះ ពុំមានច្បាប់ត្រឹមត្រូវទេ។ បើតាមវិញ្ញាបនបត្រដែល មេគង្គប៉ុស្តិ៍ ទទួលបានគឺ វេជ្ជបណ្ឌិតរូបនេះ ទើបតែបញ្ចប់ការសិក្សាទទួលវិញ្ញាបនបត្រក្នុងខែកុម្ភៈ ឆ្នាំ២០១៤កន្លងទៅនេះ ហើយមិនស្ថិតក្នុងក្របខណ្ឌជាពេទ្យរដ្ឋឡើយ។ ចំណែកស្ត្រីរងគ្រោះឈ្មោះ ជុំ លាប អាយុ ២៨ឆ្នាំ រស់នៅភូមិគោករវាង ឃុំប្រឡាយ ស្រុកស្ទោង។
ប្រភពបន្តថា មុនកើតហេតុស្ត្រីរងគ្រោះធ្លាប់មានជំងឺបេះដូងរ៉ាំរ៉ៃ តាំងពីយូរមកហើយនោះ ត្រូវបានសាច់ញាតិបានដឹកតាមម៉ូតូយកទៅគ្លីនិករបស់លោកវេជ្ជបណ្ឌិតខាងលើ។ ពេលមកដល់ លោកវេជ្ជបណ្ឌិត បានចាក់ថ្នាំ និងដាក់សេរ៉ូម ២ប្លោក ក៏ស្រាប់តែប្រកាច់ ត្រដររកខ្យល់ ។ឃើញស្ថានភាពបែបមិនស្រួល លោកវេជ្ជបណ្ឌិតជំរុញឲ្យនាំស្ត្រីរងគ្រោះយកទៅកាន់ពេទ្យបង្អែកស្រុកស្ទោង តែជាអកុសលស្ត្រីរងគ្រោះបានដាច់ខ្យល់ស្លាប់បាត់ទៅហើយ។ ក្រោយពេលដឹងថា អ្នកជំងឺបានស្លាប់ លោកវេជ្ជបណ្ឌិតវ័យក្មេងរូបនេះ ក៏បិទទ្វារគ្លីនិកហើយរត់គេចខ្លួនបាត់ភ្លាមៗតែម្តង។
ក្រុមគ្រួសារស្ត្រីរងគ្រោះបានប្រាប់ មេគង្គប៉ុស្តិ៍ នៅក្រោយពេលកើតហេតុថា ពួកគាត់មិនទាន់ដាក់ពាក្យបណ្តឹងនៅឡើយទេ ប៉ុន្តែទោះជាយ៉ាងណាក្តី សមត្ថកិច្ចពាក់ព័ន្ធត្រូវតែចាត់វិធានការឲ្យបានតឹងរ៉ឹងចំពោះវិស័យសុខាភិបាលសាធារណៈ បើមិនដូច្នេះទេភាពអនាធិបតេយ្យក្នុងវិស័យនេះ នៅតែបន្តកើតមាន និងលាតសន្ធឹងដល់ទីជនបទ ហើយទីបំផុតប្រជាពលរដ្ឋដែលនៅជិតនោះ ប្រឈមនឹងការរងគ្រោះដល់អាយុជីវិតជាបន្តបន្ទាប់មិនខានឡើយ៕ដោយ៖ខេមរា
