ភ្នំពេញ៖សាកសពអាកាសយានិកចំនួន ៤នាក់ត្រូវបានរកឃើញហើយនៅរសៀលថ្ងៃដដែលបន្ទាប់ពីការស្វះស្វែងពីអ្នកជំនាញជាច្រើនផ្នែកចុះរាវរកតាំងពីព្រឹកថ្ងៃទី១៤ខែកក្កដាឆ្នាំ២០១៤រហូតដល់ល្ងាចរួចមក។ សាកសពទាំងបួននាក់ ត្រូវបានយកទៅលាងសំអាតនៅមន្ទីរពេទ្យព្រះកេតុមាលាហៅពេទ្យធំរួចនាំយក ទៅកាន់អង្គភាពទ័ពអាកាសដើម្បីរៀបចំធ្វើបុណ្យតាមប្រពៃណី។
តាមសេចក្តីរាយការណ៍បានឲ្យដឹងថា នៅរសៀលថ្ងៃទី១៤ ខែកក្កដា ឆ្នាំ២០១៤នេះ លោក ហ៊ុន សែននាយករដ្ឋមន្ត្រីនៃព្រះរាជាណាចក្រ កម្ពុជាបានអញ្ជើញចុះទៅដល់ទីតាំងធ្លាក់ឧទ្ឋម្ភាគចក្រយោធានៅសង្កាត់ ព្រៃសខណ្ឌដង្កោ រាជធានីភ្នំពេញ។
សេចក្តីរាយការណ៏ក៏បានបញ្ជាក់ទៀតថានៅពេលនេះសន្តិសុខត្រូវបានរឹតបន្តឹងនៅជុំវិញបរិវេណរណ្តៅទឹកដែលឧទ្ឋម្ភាគចក្រធ្លាក់នោះ។ ចំណែកលោកនាយឧត្តមសេនីយ៍ ទៀ បាញ់រដ្ឋមន្ត្រីក្រសួងការពារជាតិ បានទៅដល់កន្លែង កើតហេតុ ខណៈដែលកងអង្គរក្សនិងកងរាជអាវុធហត្ថ រៀបចំការពារសុវត្ថិភាពលោកនាយករដ្ឋមន្ត្រី ហ៊ុន សែន។
ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ លោក ទៀ បាញ់មានប្រសាសនៅកន្លែងធ្លាក់ឧទ្ធម្ភាគចក្រនោះថាមិនទាន់មានការសន្និដ្ឋានជាផ្លូវការបានភ្លាមៗទេប៉ុន្តែការសន្និដ្ឋានបណ្ដោះអាសន្នថាការធ្លាក់នោះអាចមកបញ្ហាមិនប្រក្រតីខ្លះៗដូចជានៅតំបន់នោះមានរណ្ដៅដែលគេជីកអាចម៍ដីលក់មានទំហំធំពេក
ដែលលោកហៅថា ជារណ្ដៅនរកហើយតាមសេចក្ដីរាយការបឋមពីអ្នកបានឃើញហេតុការដំបូងហោះមកដល់ត្រង់នោះឧទ្ធម្ភាគចក្រនោះហាក់បន្ទាបខ្លួនចុះដោយមិនដឹងមូលហេតុអ្វីហើយស្លាបរបស់វាអាចប៉ះនឹងបញ្ចាំងដីរណ្ដៅនោះក៏ធ្លាក់ចូលទឹកតែម្ដង។
ខ្សែវិដេអូខ្លី រយៈពេល ៣៩ វិនាទីដែលអ្នកភូមិថតបានតាមទូរស័ព្ទដៃ បង្ហាញយ៉ាងច្បាស់ថា ឧទ្ធម្ភាគចក្ររបស់កងទ័ពអាកាស ដែលធ្លាក់ចូលរណ្តៅដីមានទឹកជម្រៅជាង ២០ ម៉ែត្រនាព្រឹកម៉ោងជាង ៩ ថ្ងៃទី១៤កក្កដានេះបណ្តាលមកពីកំហុសឆ្គងរបស់អ្នកបើកបរ ដែលទើបនឹងរៀនបើក។
ខ្សែវិដេអូខ្លីនោះ ក៏ត្រូវបានទូរទស្សន៍ CNC យកមកចុះផ្សាយនិងត្រូវបានគេបង្ហោះតាមហ្វេសប៊ុក នៅល្ងាចថ្ងៃទី១៤ ខែកក្កដាឆ្នាំ២០១៤ ផងដែរ។
តាមខ្សែវិដេអូខ្លីនោះបង្ហាញយ៉ាងច្បាស់ថា ឧទ្ធម្ភាគចក្រមួយគ្រឿង របស់កងទ័ពអាកាសដែលហ្វឹកហ្វឺនអ្នករៀនបើកបរនោះ បានសំកាំង ចុះចត សល់តែប្រហែល ១ម៉ែត្រពីដី តែបែរជាឧទ្ធម្ភាគចក្រនោះ ហោះទៅមុខហើយធ្លាក់ចូលក្នុងរណ្តៅដីដ៏ជ្រៅ ដែលមានទឹកជម្រៅជាង ២០ ម៉ែត្រ។
ប្រជាពលរដ្ឋឲ្យដឹងថារណ្ដៅដីនៅតំបន់នោះអាចមានទំហំប្រមាណជាង ២ហិកតារនិងមានជម្រៅប្រមាណជាង ៣០ម៉ែត្រ។ក្នុងរណ្ដៅនោះមានទឹកជម្រៅប្រមាណជាង ១០ម៉ែត្រ។ពេលស្រង់ឧទ្ធម្ភាគចក្រនោះចេញពីទឹកពុំមានសាកសពនៅក្នុងឧទ្ធម្ភាគចក្រនោះទេ។ក្រោយពេលឮសំឡេងធ្លាក់គាត់និងអ្នកភូមិទៅមើលឃើញមានម្នាក់ផុសចេញពីទឹកល្អក់ខាប់ដូចទឹកដោះគោក្នុងរណ្ដៅដីនោះគាត់ក៏យកធុងប្រេងធំមួយហែលទៅជួយហើយរងគ្រោះនោះក៏បានអោបកៅអីយន្តហោះអណ្ដែតជាប់នឹងខ្លួនផងហើយក៏ហៅឡានពេទ្យសង្គ្រោះបន្ទាន់មកដឹកយកទៅមន្ទីរពេទ្យ។
ជនរងគ្រោះដែលរងរបួសនោះមានឈ្មោះ ចេង សុខសំបូរជាមន្ត្រីយោធា និងជាសិក្ខាកាមហ្វឹកហ្វឺន។បច្ចុប្បន្នលោកកំពុងព្យាបាលនៅមន្ទីរពេទ្យកាល់ម៉ែត។ ចំណែកមនុស្ស៤នាក់ដែលស្លាប់នោះមានលោកឧត្ដមសេនីយ៍ទោ អ៊ុក ប៉ុណ្ណាយ៉ាលោកឧត្ដមសេនីយ៍ត្រី អៀង ចាន់រិទ្ឋ លោកវរសេនីយ៍ត្រី ថន វណ្ណឌីនិងលោកវរសេនីយ៍ត្រី ខាំ ប៊ុនណាន។
ក្រុមមន្ត្រីយោធាអាកាសចរណ៍បានឲ្យដឹងថា ឧទ្ធម្ភាគចក្រ Z9 ផលិតនៅប្រទេសចិន ដែលរដ្ឋាភិបាលកម្ពុជាបានបញ្ចាទិញ ១២គ្រឿងហើយត្រូវបានប្រគល់ជូនទៅកងទ័ពជើងអាកាសកម្ពុជា នៅថ្ងៃទី២៥ខែវិច្ឆិកា ឆ្នាំ២០១៣៕ម៉ានូ
