ភ្នំពេញ៖ នៅក្នុងសម័យប្រជុំរដ្ឋសភា នាព្រឹកថ្ងៃ២០តុលានេះលោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ចេញប្រតិកម្មទៅនឹងអ្នកតំណាងរាស្ត្រគណបក្សសង្គ្រោះជាតិ យ៉ែម បុញ្ញឫទ្ធិ ដែលបង្ហោះសារក្នុងហ្វេសប៊ុក “ អ្នកនយោបាយត្រូវហ៊ានបើកចិត្តឲ្យទូលាយទទួលការរិះគន់នានា”។
នាយករដ្ឋមន្ត្រី ហ៊ុន សែន បានមានប្រសាសន៍ ដោយសម្តីខ្លាំងៗ និយាយចំៗ និងលើកដៃចង្អុលទៅលោក យ៉ែម បុញ្ញឫទ្ធិ ដែលជាអ្នកតំណាងរាស្ត្រ និងជាប្រធានគណៈកម្មការមួយរូប ដែលកំពុងមានវត្តមានក្នុងកិច្ចប្រជុំរដ្ឋសភាដែរនោះថា “ខ្ញុំមិនដែលគម្រាមនរណាទេ។ ក៏ប៉ុន្តែសុំបើខឹងកុំលេង បើលេងកុំខឹង។ ឯកឧត្តម យ៉ែម បុញ្ញឫទ្ធិ! ឯកឧត្តម ប្រដៅខ្ញុំ នៅក្នុងហ្វេសប៊ុករបស់ឯកឧត្តម។ ប៉ុន្តែឯកឧត្តម កុំភ្លេចគិតថា មេរបស់ឯកឧត្តម ប្រមាថចំពោះរឿងក្នុងស្រុកទាំងមូល។ ឯកឧត្តម បែរជាប្រដៅខ្ញុំ ឲ្យខ្ញុំបើកចិត្តឲ្យទូលាយ។ យកទៅគិតគូរ។ រឿងរ៉ាវវាមិនទាន់ចប់ទេ។ បើអស់លោកចង់បន្ត ខ្ញុំកំដរលេង។ ខ្ញុំបានប្រាប់ទៅរង្ស៊ីហើយ ហើយនៅក្នុង Whatsup របស់ខ្ញុំដដែលទេ។ ខ្ញុំកំដរលេងគ្រប់ទម្រង់លេង។ គ្រប់រដូវកាល និងគ្រប់រសជាតិ។ ក្តៅ ត្រជាក់ ផ្អែម ល្វីញ ជូរ ចត់ ខ្ញុំលេងបានទាំងអស់”។
នៅពេលចេញពីកិច្ចប្រជុំរដ្ឋសភា លោក យ៉ែម បុញ្ញឫទ្ធិ អ្នកតំណាងរាស្ត្រគណបក្សសង្គ្រោះជាតិ បានថ្លែងទៅកាន់ក្រុមអ្នកកាសែតថា ក្នុងហ្វេសប៊ុករបស់លោក គឺលោកមិនបាននិយាយសំដៅលើបុគ្គលណាម្នាក់ទេ។ លោកគ្រាន់តែចង់បញ្ជាក់គឺក្នុងផលប្រយោជន៍រួម និងផលប្រយោជន៍សម្រាប់ប្រជាពលរដ្ឋប៉ុណ្ណោះ។
សូមរម្លឹកថា លោក យ៉ែម បុញ្ញឫទ្ធិ អ្នកតំណាងរាស្ត្រគណបក្សសង្គ្រោះជាតិ បានសរសេរនិងបង្ហោះវិដេអូក្នុងហ្វេសប៊ុករបស់ខ្លួន កាលពីម្សិលមិញថា “ អ្នកនយោបាយត្រូវហ៊ានបើកចិត្តទូលាយ ក្នុងការទទួលយកមតិរិះគន់ស្ថាបនា ពីគ្រប់មជ្ឈដ្ឋាន ដែលប្រៀបដូចជាកញ្ចក់ឆ្លុះ ដើម្បីធ្វើការកែលម្អ តែមិនជាកញ្ចក់បង្អួចកញ្ចក់ទ្វារ”។
ការលើកឡើងរបស់អ្នកតំណាងរាស្ត្រ គណបក្សសង្គ្រោះជាតិដូច្នេះ បានធ្វើឡើង បន្ទាប់មានការប្រតិកម្មពីនាយករដ្ឋមន្ត្រី ហ៊ុន សែន បានប្រតិកម្មយ៉ាងខ្លាំងទៅកាន់លោកសម រង្ស៊ី ដែលបានរិះគន់ថា ប្រព័ន្ធអប់រំនៅកម្ពុជា មានលក្ខណៈទន់ខ្សោយបំផុត ហើយមិនមានតម្លៃ៕ដោយ៖រដ្ឋា
លោកនាយករដ្ឋមន្រ្តី ហ៊ុន សែន បានបញ្ចេញប្រតិកម្មអ្នកតំណាងរាស្ត្រគណបក្សសង្គ្រោះជាតិ នៅក្នុងកិច្ចសម័យពេញអង្គរដ្ឋសភា នាព្រឹកថ្ងៃទី២០តុលានេះ
