ភ្នំពេញ: នៅរសៀលថ្ងៃទី១៦វិច្ឆិកានេះ លោក សម រង្ស៊ី បានប្រកាសតាមហ្វេសប៊ុកផ្លូវការរបស់លោកថា លោកបានលើកពេលក្នុងការវិលត្រឡប់ចូលមកកម្ពុជាដូចការគ្រោងទុក នៅយប់ថ្ងៃទី១៦វិច្ឆិកា ឆ្នាំ២០១៥ នោះទេ។
សំណេរក្នុងហ្វេសប៊ុករបស់លោក សម រង្ស៊ី បានលើកឡើងថា “បន្ទាប់ពីបានពិគ្រោះយោបល់ជាមួយសហការីនៅកម្ពុជា និងអង្គការអន្តរជាតិ ទ្រទ្រង់លទ្ធិប្រជាធិបតេយ្យមួយចំនួន ដែលបានស្នើឲ្យខ្ញុំលៃលកមកដល់ភ្នំពេញ ពេលថ្ងៃ ចៀសវាងពេលយប់ ហើយបានស្នើឲ្យខ្ញុំទុកពេលបន្តិច ឲ្យមជ្ឈដ្ឋានការទូត និងមិត្តបរទេសមួយចំនួន មានពេលធ្វើអន្តរាគមន៍ រកដំណោះស្រាយដោយសន្តិវិធី ចំពោះការកើនឡើងនៃអំពើហិង្សាថ្មីៗនេះ នៅប្រទេសកម្ពុជា ខ្ញុំមិនទាន់មកដល់ព្រលានយន្តហោះអន្តរជាតិភ្នំពេញ នៅរាត្រីនេះទេ។ តែនឹងមកដល់ប្រទេសកម្ពុជាវិញ ក្នុងពេលឆាប់ៗខាងមុខនេះ”៕
