ភ្នំពេញ: ជនសង្ស័យ២នាក់ ជិះម៉ូតូធ្វើសកម្មភាពឆក់កាបូបពីនារីម្នាក់ តែត្រូវជនរងគ្រោះ ស្រែកថា ចោរៗ ភ្លាមនោះធ្វើអោយមានការភ្ញាក់ផ្អើល ក៏បានត្រូវប្រជាពលរដ្ឋ លោមព័ទ្ធចាប់ប្រគល់អោយសមត្ថកិច្ច។
ហេតុការណ៍នេះ បានកើតឡើង កាលពីម៉ោង ១០ និង ៤០នាទីព្រឹកថ្ងៃទី០២ ខែវិច្ឆិកា ឆ្នាំ២០១៥ តាមបណ្តោយផ្លូវ២១៧ កែងផ្លូវបឹងតាម៉ាត ភូមិសំបួរ សង្កាត់ដង្កោ ខណ្ឌដង្កោ។
សមត្ថកិច្ចបានអោយដឹងថា ជនសង្ស័យទាំង២នាក់នេះ បានជិះម៉ូតូម៉ាកស្មាក់ ពណ៍ខៀវ គ្មានផ្លាកលេខ ហើយជនសង្ស័យទី១ ឈ្មោះ សែម រតនៈ ភេទប្រុស អាយុ១៩ឆ្នាំ មុខរបរមិនពិតប្រាកដ ទីលំនៅ ភូមិត្នោតជ្រុំ៤ សង្កាត់បឹងទំពុន ខណ្ឌមានជ័យ, ទី២ ឈ្មោះ ភាន សុភ័ណ្ឌ ភេទប្រុស មុខរបរមិនពិតប្រាកដ មានទីលំនៅ ផ្ទះជួលភូមិឬស្សី សង្កាត់ស្ទឹងមានជ័យ ខ័ណ្ឌមានជ័យ។
តាមចម្លើយសារភាពជនសង្ស័យបានអោយដឹងថា មុនពេលកើតហេតុ ឃើញជនរងគ្រោះ២នាក់ ជិះម៉ូតូ Dream C125 ពណ៍ខ្មៅឌុបគ្នា ជិះតាមផ្លូវ២១៧ ចំណុចកើតហេតុខាងលើ ខ្លួនក៏បានសម្រេចចិត្តធ្វើសកម្មភាព តែម្តង។
បច្ចុប្បន្ន ជនសង្ស័យត្រូវបានឃុំខ្លួននៅអធិការខ័ណ្ឌដងោ្ក៕
