បាត់ដំបង៖បក្ខពួកចោរប្លន់អាជីវករលក់មាសនៅផ្សារណាត់ខេត្តបាត់ដំបងកាលពីព្រលប់ៗថ្ងៃទី១២ ខែធ្នូ ម្សឹលម៉ិញនេះ ត្រូវកម្លាំងសមត្ថកិច្ចចម្រុះខេត្តបាត់ដំបង ក្របួចបានម្នាក់ទៀត នៅស្រុកមោងឬស្សី ។សមត្ថកិច្ចមិនទាន់បានបញ្ជាក់ពី អត្តសញ្ញាណក្រុមចោរប្លន់ និងស្ថាន ភាពទ្រព្យសម្បត្តិមានតម្លៃរបស់ជនរងគ្រោះដែលត្រូវក្រុមចោរប្លន់នាំយកទៅនោះ នៅឡើយទេ។
សមត្ថកិច្ចបានបញ្ជាក់ឲ្យដឹងថា បក្ខពួកចោរប្លន់ម្នាក់ទៀតដែលចាប់ខ្លួនបាននេះ គឺជាជនទី៥ក្នុងចំណោមគ្នីគ្នា៦នាក់ ។ជនសង្ស័យទី៥ នេះ ត្រូវបានចាប់ខ្លួននៅចំណុចភូមិកកោះ ឃុំកកោះ ស្រុកមោងឬស្សី ខេត្តបាត់ដំបង កាលពីព្រឹកថ្ងៃទី១៣ ខែធ្នូ ឆ្នាំ២០១៥ វេលាម៉ោង១០ កន្លះ ។
ទោះបីជាយ៉ាងណាក្តី សមត្ថកិច្ចមិនទាន់បានបង្ហាញពីសមាសភាពនិងអត្តសញ្ញាណរបស់បក្ខពួកចោរប្លន់ខាងលើនេះនៅឡើយទេ ដោយគ្រាន់តែអះអាងថា ខណៈនេះសមត្ថកិច្ចកំពុងតាមប្រមាញ់គ្នីគ្នាចោរប្លន់នៅសល់ម្នាក់ទៀតគឺជាជនសង្ស័យទី៦ ដែលកំពុងរត់គេចខ្លួន។
សូមរំឭកថា អាជីវករលក់មាសនៅក្រុងបាត់ដំបងមួយគ្រួសារ កាលពីព្រលប់ម៉ោង ៥ និង៣០នាទី ថ្ងៃទី១២ នេះ ត្រូវក្រុមចោរប្លន់ប្រដាប់អាវុធមានគ្នីគ្នា៦នាក់សម្រុកចូលប្លន់ដល់ក្នុងផ្ទះខណៈជនរងគ្រោះបានវិលត្រឡប់មកពីលក់មាសនៅផ្សារវិញ។ក្រុមចោរបានវាយស្ត្រីជាប្រពន្ធនឹងស្នាប់កាំភ្លើង ហើយបានបាញ់គំរាមប្លន់យកមាសបាន៤កេស កាបូបលុយ(តម្លៃជាង៣០ម៉ឺនដុល្លារ) និងដោះយកនាឡិកាប្លាទីនរបស់ ជនរងគ្រោះជាប្តី ហើយរត់គេចខ្លួនបាត់។
ស្ត្រីរងគ្រោះឈ្មោះ លឹម គឹមអេង អាយុ៦២ឆ្នាំ បាននិយាយដោយអាការៈស្លន់ស្លោរថា ក្រុមចោរប្រដាប់អាវុធខ្លី៣ដើម និងមានគ្នីគ្នា ៦នាក់ ជិះម៉ូតូ៣គ្រឿង តាមឡានរបស់គាត់ពេលត្រឡប់មកពីលក់មាសវិញចូលមកដល់ផ្ទះ។
ប្រភពដដែលបន្តថា វាចូលមកប្លន់ដោយបាញ់៣-៤គ្រាប់គំរាម ហើយស្ទុះចូលដណ្តើមយកកេសមាស៤កេស ដែលគាត់ទើបតែត្រឡប់មកពីលក់នៅផ្សារប៉ុន្តែមិនបាន បញ្ជាក់ពី ចំនួនមាសជាក់លាក់នោះទេ។
ក្រោយហេតុការណ៍មានស្នូរកាំភ្លើងបានលាន់ឮឡើងនេះបន្តិច សមត្ថកិច្ចបានមកដល់ និងបានសាកសួរជនរងគ្រោះ រួចកំណត់មុខសញ្ញា និងបានដាក់កម្លាំងដេញតាមប្រមាញ់ ក្រុមចោរប្លន់ប្រដាប់អាវុធទាំងនេះភ្លាមៗ និងចាប់បានគ្នីគ្នាវាចំនួន ៣នាក់ នៅចំណុច សណ្ឋាគារ ឡេង សេងណា កណ្តាលក្រុង បាត់ដំបង។
សមត្ថកិច្ចបានប្រាប់ មេគង្គប៉ុស្តិ៍ ពេលកំពុងប្រតិបត្តិការថា បេសកកម្មចុងក្រោយនេះ សមត្ថកិច្ចបានក្របួចជាប់ក្រុមចោរប្លន់បានចំនួន ៤នាក់ (ប្រុស៣ ស្រី១) ក្នុងចំណោមគ្នីគ្នា៦នាក់ នៅចំណុចសណ្ឋាគារ ឡេង សេងណា ដែលស្ថិតក្នុង ភូមិកម្មករ សង្កាត់ស្វាយប៉ោ ក្រុងខេត្តបាត់ដំបង ដែលទំនងក្រុមចោរបានចូលមកស្នាក់នៅមុនធ្វើសកម្មភាពប្លន់។បក្ខពួកដែលនៅសេសសល់កំពុងត្រូវបានតាមប្រមាញ់យ៉ាងប្រផិត ប្រផើយ។
តាមព័ត៌មានចុងក្រោយបានឲ្យដឹងថា នៅវេលាម៉ោងប្រមាណ២០ និង៥០នាទីយប់ថ្ងៃដដែលនេះ សមត្ថកិច្ចបានពើបប្រទះនឹងជនសង្ស័យ២នាក់ជិះម៉ូតូ១គ្រឿង ដែលបានជិះគេចពីសមត្ថកិច្ចយ៉ាងលឿនលើកំណាត់ផ្លូវសំដៅឆ្ពោះទៅភ្នំពេញ។
ប្រភពបន្តថា សមត្ថកិច្ចបានដេញតាមយ៉ាងប្រកិតធ្វើឲ្យជនសង្ស័យភ័យស្លន់ស្លោរលោតចេញពីម៉ូតូ នៅចំណុចភូមិកកោះ ឃុំកកោះ ស្រុកមោងឬស្សី ក្បែរស្ទឹងចក រួចរត់គេចខ្លួនចូលព្រៃ ដោយបន្សល់ទុកនៅកាំភ្លើងK59 ១ដើម រួមនឹងម៉ូតូ១គ្រឿងពាក់ស្លាកលេខកណ្ដាល1B-0312 ដោយមានបិទស្កុតខ្មៅជិត។
រហូតមកដល់វេលាម៉ោងប្រហែលជាង១០ ព្រឹកថ្ងៃទី១៣ ខែធ្នូ នេះ សមត្ថកិច្ចដែល ពង្រាយកម្លាំង ២៤ម៉ោង លើ២៤ម៉ោង បានក្របួចជាប់ជនសង្ស័យទី៥ ក្នុងចំណោម បក្ខពួក៦នាក់ និងនាំយក ទៅស្នងការដ្ឋាននគរបាលខេត្តដើម្បីស៊ើបសួរ តាមនីតិវិធី៕ ដោយ៖សុផល
