ភ្នំពេញ៖នាព្រឹកថ្ងៃចន្ទ ទី១៣ តុលានេះ ក្នុងសន្និសីទកាសែតមួយនៅសាកលវិទ្យាល័យខេមរៈ ក្នុងរាជធានីភ្នំពេញ ក្រុមយុវជន ព្រះ សង្ឃ និងប្រជាសហគមន៍មានបញ្ហាជម្លោះ ដីធ្លីបានបន្តជំទាស់នឹងគម្រោងបញ្ជូនជនភៀសខ្លួនពីប្រទេសអូស្ត្រាលី មករស់នៅកម្ពុជា។
ក្នុងសន្និសីទកាសែត នៅព្រឹកថ្ងៃចន្ទនេះ ក្រុមអ្នកតវ៉ាបានអះអាងថា កម្ពុជាមិនទាន់មានសមត្ថភាពពេញលេញដើម្បីទទួលជនអន្តោប្រវេសន៍ចូលមករស់នៅទេ ព្រោះសព្វថ្ងៃមិនទាន់មានការគោរពច្បាប់ទម្លាប់ហើយបញ្ហាដីធ្លីក៏នៅតែកើតមានដោះស្រាយមិនទាន់ចេញនៅឡើយ។
ព្រះតេជគុណ កែវ សុម៉ាលី មានថេរវាទថា ការបញ្ជូន និងការទទួលជនអន្តោប្រវេសន៍ពីអូស្ត្រាលីមកកម្ពុជា នឹងជាការមិនគោរពសិទ្ធិមនុស្ស ហើយនឹងក្លាយជាអំពើអមនុស្សធម៌ ព្រោះថា ជនអន្តោប្រវេសន៍ទាំងនោះ មិនចង់មករស់នៅកម្ពុជាទេ។ អ្នកចូលរួមសន្និសីទបានលើកឡើងថា កំពុងមានបញ្ហាសង្គមដូចជា ភាពក្រីក្រការអប់រំ ជាពិសេសបញ្ហាដីធ្លី ។
ប៉ុន្តែលោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃបានបញ្ជាក់ជាថ្មីថា រដ្ឋាភិបាលកម្ពុជា យល់ព្រមទទួលជនភៀសខ្លួនពីអូស្ត្រាលី នឹងធ្វើដោយស្ម័គ្រចិត្ត ហើយជាលាយលក្ខណ៍អក្សរថែមទៀត។ ចំណែកចំនួនគឺអប្បបរមាតិចជាង ១០០ នាក់។
លោកឧត្តមសេនីយ៍ខៀវសុភ័គ បានបញ្ជាក់ថា រដ្ឋាភិបាលនឹងបញ្ជូនមន្ត្រីទៅជំរុំភៀសខ្លួន ណៅរុ នៅក្នុងខែតុលានេះ ដើម្បីពន្យល់ពីស្ថានភាពកម្ពុជា។ សព្វថ្ងៃ កម្ពុជាបានទទួលជនភៀសខ្លួន និងអ្នកសុំសិទ្ធិជ្រកកោន ចំនួន ៩១ នាក់ មកពី ៨ ប្រទេស។
គួររំលឹកថា កាលពីថ្ងៃទី២៦កញ្ញា រដ្ឋមន្ត្រីក្រសួងមហាផ្ទៃ និងរដ្ឋមន្ត្រីអន្តោប្រវេសន៍អូស្ត្រាលី បានចុះហត្ថលេខារួមគ្នា លើអនុស្សារណៈយោគយល់គ្នា ស្តីពីការបញ្ជូន និងទទួលជនអន្តោប្រវេសន៍ ពីប្រទេសអូស្ត្រាលី មករស់នៅកម្ពុជា។ កិច្ចព្រមព្រៀងនោះ មានសុពលភាពរយៈ ពេល ៤ ឆ្នាំ៕
បាតុកម្មប្រឆាំងការទទួលយកជនភៀសខ្លួនពីអូស្ត្រាលី នាពេលកន្លងមក
