ប៉េកាំង៖ដើម្បីឈានទៅសម្រេចមហិច្ឆតាអភិវឌ្ឍន៍កម្មវិធីអវកាសរបស់ខ្លួន រដ្ឋាភិបាលក្រុងប៉េកាំងនៅ២០១៦នេះមានគម្រោងបង្កើនបេសកកម្មអវកាសជាច្រើនរបស់ខ្លួន។ ជាក់ស្តែងយានអវកាស ធៀនគុង ឬ ប្រែថា “វិមានអាកាស Tiangong2” គ្រោងនឹងបង្ហោះនៅរវាងដើមឆមាសទីពីរនៃឆ្នាំ២០១៦នេះ។ នេះបើតាមភ្នាក់ងារសារព័ត៌មានចិនថ្មីចេញផ្សាយកាលពីម្សិលមិញ។
ការបាញ់បង្ហោះយានអវកាស ធៀនកុងពីរ គឺជាកម្មវិធីមួយក្នុងគម្រោងអភិវឌ្ឍន៍វិស័យអវកាស របស់ចិនដែលចង់ក្លាយជាមហាអំណាចពេញសិទ្ធិទាំងផ្នែកសេដ្ឋកិច្ច និងអវកាស ដោយមានមហិច្ឆតាឈានទៅបង្កើតឱ្យបាននូវស្ថានីយអវកាសអចិន្ត្រៃយ៍មួយក្នុងលំហតារាវីថីនៅឆ្នាំ២០២២។
Tiangong 2 ឬ វិមានអាកាស២ យានអវកាសពិសោធន៍ នឹងត្រូវបង្ហោះចេញពី កោះហៃណាន់ នៅរវាងត្រីមាសទីបីឆ្នាំ២០១៦នេះ ដើម្បីទៅតភ្ជាប់ទៅនឹងយានអវកាស Tianzhou១ នាវាអាកាស ក្នុងលំហអាកាស។ កម្មវត្ថុនៃការបង្ហោះមន្ទីរពិសោធន៍វិមានអាកាស២ នេះ គឺដើម្បីធ្វើតេស្តសាកល្បងបច្ចេកវិទ្យានៃជីវិតនៅក្នុងតារាវិថី។
បន្ទាប់មក នៅក្នុងត្រីមាសទីបួនឆ្នាំនេះដដែល ប៉េកាំងក៏នឹងត្រូវបង្ហោះយានអវកាសមួយទៀត ឈ្មោះថា Shenzhou ១១ (នាវាទេវតា) ដែលមានផ្ទុកអវកាសយានិកពីររូប ទៅជាមួយ ដើម្បីភ្ជាប់ខ្លួននឹងយានអវកាសវិមានអាកាស២ទៅពង្រឹងស្ថានីយអវកាស។ យានអវកាសដែលជាមណ្ឌលសំខាន់នៃអនាគតស្ថានីយអវកាសចិននឹងត្រូវបង្ហោះទៅនៅឆ្នាំ២០១៨៕
