ភ្នំពេញ៖ អ្នកនាំពាក្យក្រសួងមហាផ្ទៃបានប្រាប់ ឲ្យនៅរសៀលថ្ងៃទី១៤ ខែវិច្ឆិកានេះថា លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ បានទទួលលិខិតរបស់លោក សម រង្ស៊ី ប្រធានគណបក្សសង្គ្រោះជាតិ ដែលបានស្នើឲ្យមានការដោះលែងលោក មាជ សុវណ្ណារ៉ា ប្រធាននាយកដ្ឋានព័ត៌មាន និងផ្សព្វផ្សាយ និងជាអនុប្រធានក្រុមការងារគណបក្សសង្គ្រោះជាតិ នៅខេត្តបន្ទាយមានជ័យ និងបានបញ្ជូនសំណើនេះ ទៅក្រសួងយុត្តិធម៌ ដើម្បីពិនិត្យ និងផ្តល់យោបល់ហើយ។
លោក ខៀវ សុភ័គ បានបញ្ជាក់ថា ឯកឧត្តមឧបនាយករដ្ឋមន្ត្រីបានចាត់ឲ្យ បញ្ជូនលិខិត របស់លោក សម រង្ស៊ី ដែលស្នើឲ្យដោះលែងនឹង ទៅក្រសួងយុត្តិធម៌ ដើម្បីពិនិត្យ និងស្នើយោបល់។
គួរបញ្ជាក់ថា កាលពីព្រឹកថ្ងៃទី១១ ខែវិច្ឆិកា ឆ្នាំ២០១៤ លោក មាជ សុវណ្ណារ៉ា ដែលជា មន្ត្រីគណបក្សសង្គ្រោះជាតិ ត្រូវបានកម្លាំងអាជ្ញាធរមានសមត្ថកិច្ច ចាប់ខ្លួន នៅចំណុចជិតពេទ្យអង្គឌួង ខណៈពេលដែលកំពុងតែធ្វើដំណើរ។
មន្ត្រីគណបក្សសង្គ្រោះជាតិរូបនេះ ត្រូវបានតុលាការចោទប្រកាន់ពីបទ ដឹកនាំកុបកម្ម ញុះញង់ឲ្យប្រព្រឹត្តបទឧក្រិដ្ឋជាអាទិ៍ និងផ្តួចផ្តើមគំនិតក្នុងអំពើហិង្សាដោយចេតនាមានស្ថានទម្ងន់ទោស ប្រព្រឹត្តនៅចំណុចនៅទីលានប្រជាធិបតេយ្យ កាលពីថ្ងៃទី១៥ ខែកក្កដា ឆ្នាំ២០១៤៕
