ភ្នំពេញ:លោកស្រី សម មុនី្នកា រដ្ឋលេខា ធិការក្រសួងទេសចរណ៍ បានផ្តល់ថវិកា ២០០០ ដុល្លារ ទៅកាន់មន្ទីរពេទ្យគន្ធបុប្ផា កាលពីថ្ងៃទី១៣វិច្ឆិកា។ ថវិកានោះ ស្ថិតក្នុងចំណោមថវិកា ៤០០០ ដុល្លារ ដែលលោកស្រី សម មុនី្នកា ទទួលបានពីការបង់ជំងឺចិត្ត ពីអ្នកបើកឡានតាក់ស៊ីម្នាក់ ភ្នំពេញ-រតនគិរី ដែលលោកស្រី ប្តឹងថា ធ្វើឲ្យលោកស្រី ភិតភ័យ ដោយសារតែឡានតាក់ស៊ីនោះ ត្រូវលោកស្រី ជួលជិះ ហើយដាច់រ៉ូទៀល ខូច។
ការបរិច្ចាគថវិកា ២០០០ ដុល្លារ ដល់មន្ទីរពេទ្យគន្ធបុប្ផា កាលពីថ្ងៃទី១៣វិច្ឆិកា បន្ទាប់ពីកាកបាទក្រហមកម្ពុជា បានចេញសេចក្តីប្រកាស បដិសេធមិនទទួលយកថវិការបស់លោកស្រី សម មុនី្នកា ដែលបានប្រកាសថា នឹងបរិច្ចាគថវិកាបានមកពីសំណងជំងឺចិត្តនោះ ទៅកាន់កាកបាទក្រហមកម្ពុជា។
យ៉ាងណាក៏ដោយ នៅថ្ងៃទី១៤វិច្ឆិកានេះ កាកបាទក្រហមកម្ពុជា បានផ្តល់ថវិកា ២០០០ ដុល្លារ ឲ្យទៅម្ចាស់រថយន្តតាក់ស៊ី ដែលរងការប្តឹងផ្តល់ពីលោកស្រី សម មុន្នីកា។ ជំនួយរបស់កាកបាទក្រហមនោះ ដើម្បីឲ្យម្ចាស់ឡាន យកទៅជួលជុលឡានតាក់ស៊ី ដែលខូចនោះ។
ជាការ កត់សម្គាល់ ក្រោយពីហ្វេសប៊ុកបានចុះផ្សាយរឿងដ៏គួរឲ្យហួសចិត្ត ដែលលោកស្រី សម មុន្នីកា បានប្តឹងទារជំងឺចិត្តពីអ្នកបើកឡានតាក់ស៊ីម្នាក់នូវទឹកប្រាក់ ៤០០០ ដុល្លាររួចមក គឺអ្នកលេងហ្វេសប៊ុក បានរៃអង្គាសផ្តល់ថវិកាដល់អ្នកបើកឡាននោះ។ ក្នុងនោះ លោកខៀវកាញារីទ្ធ រដ្ឋមន្ត្រីក្រសួងព័ត៌មាន បានផ្តល់ឲ្យអ្នកបើកឡានតាក់ស៊ី ៥០០ ដុល្លារ លោកគឹមសន្តិភាព អនុរដ្ឋលេខាធិការ និងជាអ្នកនាំពាក្យក្រសួងយុត្តិធម៌ ១០០ ដុល្លារ ព្រមទាំងសប្បុរសជនជាច្រើននាក់ផ្សេងទៀត៕ CEN
