រថយន្តបុកម៉ូតូផ្ទុះឆេះ ទាំងរថយន្ត និងម៉ូតូ,ស្លាប់២នាក់ របួសធ្ងន់ស្រាល៤នាក់
រាជធានីភ្នំពេញ៖កាលពីយប់មិញកើតមានករណីបើករថយន្តបុកម៉ូតូផ្ទុះឆេះ ទាំងរថយន្ត និងម៉ូតូបណ្តាលឲ្យមនុស្ស ២នាក់ស្លាប់ និងរបួសធ្ងន់ស្រាល៤នាក់។ ហេតុការណ៍នោះបានកើតឡើងនៅតាមផ្លូវ៦០ម៉ែត្រ សង្កាត់ចាក់អង្រែលើ ខណ្ឌមានជ័យ។
សមត្ថកិច្ចឲ្យដឹងថា រថយន្តបង្កហេតុម៉ាកកាមរី ហាប្រីត ស្លាកលេខរថយន្ត 2W -6797 និងម៉ូតូមួយគ្រឿងម៉ាកស្មាស់ ត្រូវបានឆេះខ្ទេចទាំងស្រុង។ ករណីនេះកើតឡើងនៅម៉ោងប្រមាណជាង៩៖៣០នាទីយប់ថ្ងៃទី០២ ខែឧសភា ឆ្នាំ២០១៦។ យ៉ាងណាក៏ដោយ អ្នកបើកបរត្រូវបានចាប់ខ្លួន ហើយបញ្ជូនទៅកាន់អធិការដ្ឋាន ខណ្ឌមានជ័យ ដើម្បីចាត់ការតាមច្បាប់៕
