អន្តរជាតិ៖យន្តហោះ Solar Impulse 2 បានចុះចតនៅថ្ងៃអង្គារក្នុងប្រទេសអារ៉ាប់រួមដោយបញ្ចប់ការធ្វើដំណើររបស់ខ្លួនដើម្បីក្លាយជាយន្តហោះដើរដោយថាមពលព្រះអាទិត្យដំបូងគេដែលធ្វើដំណើរជុំវិញពិភព លោកដោយមិនមានប្រេងឥន្ធនៈមួយតំណក់ដើម្បីលើកកម្ពស់ថាមពលកកើតឡើងវិញ។
យន្ដហោះនេះបានចុះចតនៅម៉ោង០៤:០៥ក្នុងរដ្ឋធានី អាប៊ូ ដាប៊ី បន្ទាប់ពីហោះហើរអស់រយៈពេលជាង ៤៨ម៉ោងចេញពីទីក្រុង គែរ ដែលនេះជាជើងចុងក្រោយក្នុងការធ្វើដំណើររបស់ខ្លួនដែលបានចាប់ផ្តើមនៅថ្ងៃទី៩ខែមីនាឆ្នាំមុន។
មានការអបអរសាទរនិងទះដៃស្វាគមន៍ចំពោះយន្តហោះនេះនៅពេលដែលវាបានមកដល់ ព្រលានយន្តហោះ Al-Bateen Executive ជាកន្លែងដែលវាចាប់ផ្តើមដំណើរជុំវិញពិភពលោកលើកដំបូងរបស់ខ្លួន។ នេះបើយោងតាមសេចក្តីរាយការណ៍របស់អ្នកកាសែត AFP ។
អ្នករុករកសញ្ជាតិស្វីសនិងជាប្រធានគម្រោងនេះគឺលោក Bertrand Piccard បានស្ថិតនៅក្នុងកាប៊ីន យន្ដ ហោះនេះក្នុងអំឡុងពេលការហោះហើរចម្ងាយ២.៧៦៣គីឡូម៉ែត្រចេញពីទីក្រុងគែរដោយឆ្លងកាត់សមុទ្រក្រហម វាលខ្សាច់អារ៉ាប៊ីសាអ៊ូឌីតដ៏ធំល្វឹងល្វើយនិងហោះពីលើឈូងសមុទ្រ Gulf ។
ការហោះហើរនេះបានកំណត់ការធ្វើដំណើរចម្ងាយ៤២.០០០គីឡូម៉ែត្រឆ្លងកាត់ទ្វីបចំនួនបួន មហាសមុទ្រពីរនិងសមុទ្របី។
យន្តហោះមួយគ្រឿងនេះគឺជាលទ្ធផលនៃការស្រាវជ្រាវរយៈពេល១២ឆ្នាំរបស់លោក Bertrand Piccard និងលោក André Borschberg។
យន្តហោះនេះមិនមានទម្ងន់ធ្ងន់ជាងរថយន្តទេប៉ុន្តែវាមានស្លាបនៃយន្តហោះ Boeing 747 និងបន្ទះសូឡា ប្រហែល១៧.០០០បន្ទះបំពាក់នៅលើស្លាប។
យន្ដហោះនេះបានប្រើថិរវេលាល្បឿនមធ្យម៨០គីឡូម៉ែត្រក្នុងមួយម៉ោង។ អ្នកបើកយន្តហោះនេះត្រូវប្រើធុងអុកស៊ីសែនដើម្បីដកដង្ហើមនៅរយៈកម្ពស់ខ្ពស់និងស្លៀកពាក់ឈុតដែលបានរចនាឡើងជាពិសេសដើម្បីទប់ទល់ជាមួយនឹងលក្ខខណ្ឌធ្ងន់ធ្ងរ ។
អ្នកបើកត្រូវទប់ទល់នឹងសីតុណ្ហភាពនៅក្នុងកាប៊ីនយន្ដហោះដ៏តូចមួយចាប់ពីដក២០អង្សាសេទៅដល់បូក៣៥អង្សាសេ។
គួរបញ្ជាក់ថា លោក Piccard បាននិយាយថា លោកបានចាប់ផ្តើមគម្រោងនេះនៅឆ្នាំ២០០៣ដើម្បីបង្ហាញថា ថាមពលកកើតឡើងវិញគឺអាចសម្រេចបានទាំងមិនអាចទៅរួច៕
