ឃាត់ខ្លួនជនជាតិថៃម្នាក់ និងគ្រឿងញៀនជិត២០គីឡូក្រាម
រាជធានីភ្នំពេញ៖កម្លាំងជំនាញរបស់មន្ទីរប្រឆាំងគ្រឿងញៀនក្រសួងមហាផ្ទៃបើកប្រតិបត្តិការបង្ក្រាបនិងឃាត់ខ្លួនបុរសជនជាតិថៃម្នាក់ភ្លាមៗជាមួយនឹងវត្ថុតាងថ្នាំញៀនប្រភេទម៉េតំហ្វេតាមីន(ICE) ទឹកកក ទម្ងន់ជិត២០គីឡូក្រាម។ ការឃាត់ខ្លួននេះធ្វើឡើងកាលពីល្ងាចម្សិលមិញនៅចំណុចផ្លូវលំ ភូមិត្រពាំងឈូក សង្កាត់ទឹកថ្លា ខណ្ឌសែនសុខ។
សមត្ថកិច្ចបានឲ្យដឹងថា ជនសង្ស័យមានឈ្មោះ ឆៃ យ៉ាភុងភិសៃផាន់ ជនជាតិថៃ អាយុ៥២ឆ្នាំ ត្រូវបាននាំខ្លួនយកទៅធ្វើការសាកសួរនៅមន្ទីរប្រឆាំងគ្រឿងញៀនក្រសួងមហាផ្ទៃ។ ប្រភពបញ្ជាក់ថា មុនដល់ឈានការឃាត់ខ្លួនជនសង្ស័យកម្លាំងជំនាញបានធ្វើការស៊ើបអង្កេតស្រាវជ្រាវកំណត់មុខសញ្ញា និងឃាត់ខ្លួនភ្លាមៗក្នុងបទល្មើសជាក់ស្តែងជាមួយនឹងថ្នាំញៀនជិត២០គីឡូក្រាមនោះ៕
