រថយន្តដឹកកម្មករក្រឡាប់ជះមនុស្សពេញផ្លូវនៅកំពង់ស្ពឺ
ខេត្តកំពង់ស្ពឺ៖រថយន្តដឹកកម្មករ-កម្មការនីបានក្រឡាប់បណ្តាលឲ្យជះមនុស្សចេញពីរថយន្តដេកស្តូកស្តឹងពេញផ្លូវ ដែលហេតុការណ៍កើតឡើងនាវេលាម៉ោង០៦ និង៣០នាទីព្រឹកថ្ងៃទី០៣ ខែកក្កដា ឆ្នាំ២០១៦នេះ នៅលើកំណាត់ផ្លូវជាតិលេខ៥១ ឋិតនៅភូមិភ្នំតូច ឃុំ-ស្រុកឧដុង្គ ខេត្តកំពង់ស្ពឺ។
តាមប្រពភព័ត៌មានបានឲ្យដឹងថា រថយន្តម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ កំពង់ស្ពឺ 2A 3787 ដឹកកម្មករ-កម្មការនីចំនួន៤០នាក់ បានបើកបរយ៉ាងលឿន លុះមកដល់ចំណុចកើតហេតុក៏បានរេចង្កូតក្រឡាប់ ជះមនុស្សមកលើផ្លូវតែម្តង។ មានកម្មករចំនួន២០នាក់បានរងរបួស ក្នុងនោះ៨នាក់របួសធ្ងន់ត្រូវបានដឹកយកទៅកាន់មន្ទីរពេទ្យ និងគ្លីនិកនៅជិតៗនោះ៕
