ដោយ៖ប្រុញ វិធិន
ក្រចេះ៖ក្រុមឈ្មួញរកស៊ីដឹកជន្លង់ម្រេច ប្រមាណជាង៥០នាក់ បាននាំគ្នាសម្រុកចូលទីបញ្ជាការមូលដ្ឋានកងរាជអាវុធហត្ថក្រុងក្រចេះ រំដោះយករថយន្តសាំងយ៉ុងដឹកជន្លង់ម្រេចចំនួន ២គ្រឿង បានសម្រេច ក្រោយពេលសមត្ថកិច្ចចម្រុះ ឃាត់ទុកបានរយៈពេលជា១០ម៉ោង ។
ហេតុការនេះ បានកើតឡើងនៅវេលាម៉ោង ១២និង០០នាទីថ្ងៃទី០៣ ខែសីហា ឆ្នាំ២០១៦ បន្ទាប់ពីរថយន្ត ២គ្រឿង ក្នុងចំណោមរថយន្តសាំងយ៉ុង ១០គ្រឿង ត្រូវបានកម្លាំងជំនាញរដ្ឋបាលព្រៃឈើក្រចេះ ដឹកនាំដោយលោក ទ្រី ម៉េងលាង នាយរងផ្នែករដ្ឋបាលព្រៃឈើក្រចេះ សហការជាមួយកម្លាំងអាវុធហត្ថខេត្ត និងអាវុធហត្ថក្រុងក្រចេះ ដោយមានការសម្របសម្រួលពីលោក ហាក់ ហ៊ន ព្រះរាជអាជ្ញារងអមសាលាដំបូងខេត្ត ចុះបង្ក្រាបឃាត់បានកាលពីវេលាម៉ោងជាង១១យប់ថ្ងៃទី០២ ខែសីហា ម្សិលមិញនេះ នៅត្រង់ចំនុចមុខទីបញ្ជាការមូលដ្ឋានកងរាជអាវុធហត្ថក្រុងក្រចេះ ក្រុងក្រចេះ។
ប្រជាពលរដ្ឋ ដែលជាក្រុមឈ្មួញរកស៊ីដឹកជន្លង់ម្រេចទាំងនោះ មានទីលំនៅភូមិព្រែកជីក ឃុំសោប ស្រុកព្រែកប្រសព្វ ខេត្តក្រចេះ ។ លុះនៅព្រឹកថ្ងៃទី០៣ ខែសីហា មុនពេលកើតហេតុ គេសង្កេតឃើញថា ក្រុមឈ្មួញមួយក្រុមនេះ បាននាំគ្នាតវ៉ានៅមុខសាលាខេត្តក្រចេះ ដើម្បីទាមទារឲ្យមានការដោះលែងរថយន្តនោះវិញ តែមិនទទួលបានលទ្ធផល ។ ក្រុមឈ្មួញទាំងនោះ ក៏បានបន្តដំណើរឆ្ពោះទៅកាន់ទីបញ្ជាការដ្ឋានអាវុធហត្ថក្រុងក្រចេះ ដែលជាកន្លែងរក្សាទុករថយន្តបណ្ដោះអាសន្ន រួចក៏នាំគ្នាអុកឡុករំដោះយករថយន្តចេញតែម្ដង ។
នៅក្នុងហេតុការរំដោះយករថយន្តទាំង ២គ្រឿងខាងលើនោះ ក្រុមឈ្មួញបានធ្វើឲ្យប៉ះពាល់ដល់សន្តិសុខសណ្ដាប់ធ្នាប់សាធារណៈ និងខូចខាតនូវរថយន្តរបស់អាវុធហត្ថក្រុង មួយគ្រឿង ដែលជាទ្រព្យសម្បត្តិ៍រដ្ឋ ប៉ុន្តែមិនមានការប៉ះទង្គិចគ្នារវាងកងកម្លាំង និងក្រុមឈ្មួញទាំងនោះឡើយ ។
ពាក់ព័ន្ធជុំវិញករណីក្រុមឈ្មួញរកស៊ីដឹកជន្លង់ម្រេច ចូលអុកឡុក និងរំដោះយករថយន្តសាំងយ៉ុង ចេញពីទីបញ្ជាការដ្ឋានកងរាជអាវុធហត្ថក្រុងក្រចេះ លោក ផាត សុភ័ក្រវាសនា មេបញ្ជាការកងរាជអាវុធហត្ថក្រុងក្រចេះ បានឲ្យដឹងតាមទូរសព្ទ័ថា នៅពេលដែលពួកគាត់សម្រុកចូលមក លោកបានឆ្លងយោបល់ជាមួយព្រះរាជអាជ្ញា និងមេបញ្ជាការអាវុធហត្ថខេត្ត ដោយឲ្យកម្លាំងនៅស្ងៀម ជៀសវាងការប៉ះទង្គិចគ្នារវាងប្រជាពលរដ្ឋ និងកម្លាំងសមត្ថកិច្ច ។
លោក បានបញ្ជាក់ថា ឥឡូវនេះ មន្ត្រីជំនាញរបស់លោក កំពុងកសាងសំនុំរឿង និងបញ្ជូនឈ្មោះ បង្ហាញមុខ អ្នកដែលធ្វើសកម្មភាពយករថយន្តនោះ បញ្ជូនទៅស្ថាប័នតុលាការខេត្ត ដើម្បីចាត់វិធាន់ការទៅតាមផ្លូវច្បាប់ ។
ចំណែកឯ សាក្សីដែលបានឃើញហេតុការ បានប្រាប់ឲ្យដឹងថា ខណៈដែលសមត្ថកិច្ច ចុះបង្ក្រាបរថយន្តសាំងយ៉ុងដឹកជន្លង់ម្រេច មានរថយន្តសាំងយ៉ុងដឹកជន្លង់ម្រេច ២គ្រឿង បានបើកទៅបុកគ្នាឯងពីក្រោយ បណ្ដាលឲ្យរងរបួសធ្ងន់២នាក់ កំពុងសម្រាកព្យាបាលនៅមន្ទីរពេទ្យបង្អែកខេត្ត ។ សមត្ថកិច្ច ក៏ឃាត់ចាប់រថយន្ដទាំងនោះ តែក្រុមអ្នកដឹកជន្លង់ម្រេចទាំងនោះ បានចុះស្រែកឡូឡា រើជន្លង់ម្រេចទំលាក់ចោលពាស់ពេញផ្លូវ គំរៀមវាយឡានសមត្ថកិច្ច បើកឡានបំរុងបុកឡានសមត្ថកិច្ច និងបើកឡានរត់ចេញ នឹងបង្កការភ្ញាក់ផ្អើលពេញក្នុងក្រុងក្រចេះ ។
ដោយឡែកប្រភពពីប្រជាពលរដ្ឋ និងមជ្ឈដ្ឋានមួយចំនួន បានលើកឡើងថា រថយន្តដឹកជន្លងម្រេចទាំងនោះ គឺដឹកជញ្ជូនទាំងថ្ងៃ ទាំងយប់ ហើយមានលក្ខណៈជាក្រុមៗ ចាប់ពី១០រថយន្តឡើកទៅ តែងតែបើកបិទគូទគ្នាយ៉ាងអនាធិបតេយ្យ នឹងតែងតែធ្វើអោយប្រជាពលរដ្ឋមានការភ័យខ្លាចជាខ្លាំងក្នុងការធ្វើដំណើរតាមដងផ្លូវសាធារណៈ៕
