រាជធានីភ្នំពេញ៖កម្លាំងនគរបាលខណ្ឌពោធិសែនជ័យបានឃាត់ខ្លួនមុខសញ្ញាចែកចាយគ្រឿងញៀន ដ៏សកម្មម្នាក់ដែលធ្វើឲ្យប្រជាពលរដ្ឋមានការព្រួយបារម្ភយ៉ាងខ្លាំង ដែលការឃាត់ខ្លួននេះធ្វើឡើងនៅចំណុចភូមិត្រពាំងពោធិ សង្កាត់ចោមចៅ នាយប់ថ្ងៃទី១៩ ខែសីហា ឆ្នាំ២០១៦។
អធិការនគរបាលខណ្ឌពោធិសែនជ័យ លោក យឹម សារ៉ាន់ បានឲ្យដឹងថា ជនសង្ស័យឈ្មោះ ជា សុភា អាយុ២៧ ឆ្នាំ។ លោកអធិការបញ្ជាក់ថា ក្នុងការឃាត់ខ្លួននេះកម្លាំងនគរបាលបានដកហូតបានវត្ថុតាង ម្សៅក្រាមស ២កញ្ចប់ធំតូចនោះ និងម៉ូតូ០១គ្រឿង ម៉ាក់ scopy ផងដែរ។
មន្ត្រីនគរបាលបានឲ្យដឹងថា ជនសង្ស័យរូបនេះ តែងតែធ្វើសកម្មភាពលក់ ចែកចាយគ្រឿងញៀនយ៉ាងខ្លាំង នៅតាមតំបន់ជាយក្រុង ដែលធ្វើឲ្យប៉ះពាល់យ៉ាងធ្ងន់ធ្ងរដល់កូនៗរបស់ប្រជាពលរដ្ឋមួយចំនួន ដែលទទួលផលអាក្រក់ពីគ្រឿងញៀននេះ។
សម្រាប់ជនសង្ស័យ និងវត្ថុតាងទាំងនេះត្រូវបានយកទៅសួរនាំ នៅអធិការដ្ឋាននគរបាលខណ្ឌដើម្បីចាត់ការបន្តទៀត៕
