ដោយ៖ប៉ែនសុផល
បាត់ដំបង៖ពលរដ្ឋរស់នៅក្នុងខេត្តបាត់ដំបងបានរិះគន់ទៅលើបទល្មើសនេសាទនៅតាមបណ្តោយដងស្ទឹងសង្កែមាន ឆ្នុក,ស្បៃ,អ៊ុយ,សម្រះ កំពុងបំផ្លាញពូជត្រីធម្មជាតិ មិនដែលឃើញមានមន្ត្រីជំនាញណាម្នាក់ចុះទៅហាមឃាត់ ឬបង្ក្រាបនោះឡើយ ។
ពលរដ្ឋបានលើកឡើងថា បើទោះបីរដូវហាមឃាត់ ឬរដូវ នេសាទក៏ដោយ គេសង្កេតឃើញថា ជារៀងរាល់ឆ្នាំគេតែងឃើញបទល្មើសនេសាទ ,ឆ្នុក ,ស្បៃ, អ៊ុយ,សម្រះ តែងកើតមានជាហូរហែគ្រប់ទី កន្លែងជាពិសេសក្នុងស្ទឹងសង្កែមានរាប់សិបកន្លែងចាប់ពីចំណុចខាងមុខសាលាខេត្ត រហូតទៅដល់ឃុំវត្តតាមិមក្នុង ស្រុកសង្កែនិងស្រុកឯកភ្នំខេត្តបាត់ដំបងតែម្តង ។
បទល្មើសនេសាទ ,ឆ្នុក,ស្បៃ , អ៊ុយ និងសម្រះ ទាំងអស់នេះកំពុងត្រូវបានបំផ្លាញរាល់ពូជត្រីធម្មជាតិហើយមិនដែលឃើញមានមន្ត្រីជំនាញណាម្នាក់ចុះទៅធ្វើការហាមឃាត់ ឬបង្ក្រាបឡើយ ។
បើតាមការលើកឡើងពីខាងក្រុមអ្នករកស៊ីដាក់ ,ឆ្នុក ,ស្បៃ , អ៊ុយនិងសម្រះនៅក្នុងស្ទឹង
សង្កែបានប្រាប់ថា មន្ត្រីជលផលឲ្យដាក់អី ដាក់ទៅតែបើសិនជាខាងពត៍មានចុះផ្សាយលោកនិងចុះចាប់ ។
ជំវិញករណីបទល្មើសនេសាទនេះផងដែរ លោក ជួង សុភា នាយខណ្ឌជលផលខេត្តបាត់ដំបងបានប្រាប់(មេគង្គប៉ុស្តិ៍)យើងនារសៀលថ្ងៃទី២៥ សីហា នេះថារឿង ,ឆ្នុក, ស្បៃ, អ៊ុយ,និងសម្រះនៅក្នុងស្ទឹងសង្កែលោកទើបនឹងទទួលបាន ហើយលោកបានចាត់អោយខាងសង្កាត់ចុះទៅទប់ស្កាតនិងបង្ក្រាបឲ្យបានទាន់ពេល ។ រីឯលោក យឹម ហួរ នាយសង្កាត់រដ្ឋបាលជលផលខេត្តបានប្រាប់(មេគង្គប៉ុស្តិ៍)ផងដែរថាក្នុងបញ្ហាបទល្មើសនេសាទនៅស្ទឹងសង្កែនេះលោកបានរៀបចំចុះទៅទប់ស្កាត់និងធ្វើការបង្ក្រាបដោយផ្ទាល់ ។ ប៉ុន្តែដោយលោកជាប់ប្រជុំទើបលោកលើកទៅថ្ងៃស្អែកវិញដូច្នេះគម្រោងនេះត្រូវដាក់វិធានការជាក់ស្រែងនៅពេលក្រោយ ៕
