ដោយ៖ប៉ែន សុផល
ខេត្តបាត់ដំបង៖មានករណីឃាតកម្មដែលបង្កឡើងដោយជនសង្ស័យឈ្មោះ ស៊ើត ស៊ីន ភេទប្រុស អាយុ៣៥ឆ្នាំ បានយកញញួរវាយទៅលើឪពុកបង្កើតរបស់ខ្លួនឈ្មោះ ដែង ស៊ើត អាយុ៧៥ឆ្នាំ រស់នៅកន្លែងកើតហេតុ បណ្តាលឲ្យស្លាប់។ ករណីនេះកើតឡើងនៅថ្ងៃទី៣០ ខែសីហា ឆ្នាំ២០១៦ ម៉ោងប្រហែល១៦ និង០០នាទី នៅចំណុចក្រុម៥ភូមិ អន្លង់តាម៉ី ឃុំឈើទាល ស្រុកបាណន់ ខេត្តបាត់ដំបង។
បើតាមប្រភពព័ត៌មានពីកន្លែងកើតហេតុបានឲ្យដឹងថា ជននេះជាមនុស្សស្រវឹងខួប ស្ទើរគ្មានស្មារតីជាមនុស្ស ហើយតែងរករឿងឪពុករាល់ថ្ងៃដើម្បីបានលុយទិញស្រាផឹក។ ប្រភពបន្តថា គ្រួសារគាត់គឺមានតែពីរនាក់ឪពុក និងកូនប៉ុណ្ណោះ។
ក្រោយកើតហេតុកំលាំងជំនាញ នៃអធិការដ្ឋាននគរបាលស្រុកបាណន់បានចុះទៅដល់កន្លែងកើតហេតុ និងបានធ្វើការឃាត់ខ្លួនជនសង្ស័យដើម្បីរៀបចំសំណុំរឿងបញ្ជូនទៅតុលាការចាត់ការតាមផ្លូវច្បាប់៕
