ឃាតករលាក់មុខដ៏ឃោរឃៅសល់ពីរសម័យសង្គ្រាមសម្លាប់មនុស្សទៀតហើយ
ដោយ៖ប៉ែនសុផល
បាត់ដំបង៖បុរសអ្នកចំការម្នាក់ពេលកំពុងភ្ជួរដីដាំដំណាំលើដីទីវាលចាស់របស់ខ្លួនបានប៉ះចាំគ្រាប់មីនប្រភេទធ្ងន់ផ្ទុះបណ្តាលអោយត្រាក់ទ័ររងការខូចខាតយ៉ាងដំណំ និងបានធ្វើអោយបុរសម្នាក់ជាម្ចាស់កម្មសិទ្ធិរងរបួសធ្ងន់ធ្ងរ ហើយស្លាប់នៅតាមផ្លូវខណៈដឹកបញ្ជូនទៅកាន់មន្ទីរពេទ្យក្នុងស្រុក។
ប្រជាពលរដ្ឋបានអោយដឹងថា គ្រោះថ្នាក់នេះកើតឡើងនៅវេលាម៉ោង១២ និង៣០នាទីថ្ងៃទី០១ ខែកញ្ញា ឆ្នាំ២០១៦នៅចំណុចភូមិប៊ួរុន ឃុំត្រែង ស្រុករតនៈមណ្ឌល ខេត្តបាត់ដំង។ ប្រភពបញ្ជាក់ថា ជនរងគ្រោះឈ្មោះ ជិន កំសាន ភេទប្រុស អាយុ៣៣ឆ្នាំ មានមុខរបរធ្វើចំការស្នាក់នៅភូមិ ឃុំកន្លែងកើតហេតុបានផ្ទុះមីនប្រភេទធ្ងន់ហៅមីនតោនដែលនៅសេសសល់ពីសម័យសង្គ្រាម គ្រាដែលភ្ជួរដីក្នុងតំបន់សមភូមិក្តៅកាលពីអតីតកាល៕
