ភ្នំពេញ៖តំណាងរាស្ត្រ៣៣រូប ក្នុងចំណោមតំណាងរាស្ត្រទាំង៥៥រូបរបស់គណបក្សសង្គ្រោះជាតិត្រូវបានអង្គភាពប្រឆាំងអំពើពុករលួយ (អ.ប.ព)ទាមទារឲ្យប្រកាសទ្រព្យសម្បត្តិ និងបំណុលមិនឲ្យលើសពីជាង៣០ថ្ងៃ បន្ទាប់ពីតំណាងរាស្ត្រទាំងនេះបានចូលកាន់អាសនៈនៅរដ្ឋសភា។
គេហទំព័ររបស់អង្គភាពអ.ប.ព ដែលផ្សាយកាលពីថ្ងៃទី០២កញ្ញា បានបង្ហាញថា តំណាងរាស្ត្រគណបក្សសង្គ្រោះជាតិទាំង៥៥នាក់ មកពីគណបក្សសង្គ្រោះជាតិ ដែលបានស្បថចូលកាន់តំណែងក្នុងនោះ២២នាក់ នឹងបន្តកាតព្វកិច្ចប្រកាសទ្រព្យសម្បត្តិ និងបំណុលរយៈពេល២ឆ្នាំ លើកទី២ (នៅខែមករា ឆ្នាំ២០១៥) ហើយ៣៣នាក់ទៀត នឹងត្រូវប្រកាសទ្រព្យសម្បត្តិ និងបំណុលមិនឲ្យ លើសពី រយៈពេល៣០ថ្ងៃ បន្ទាប់ពីពួកគេចូលកាន់តំណែង។
គួរបញ្ជាក់ថា បើតាមបញ្ជីដែលទាមទារដោយអង្គភាពប្រឆាំងអំពើពុករលួយគឺតំណាងរាស្ត្រចំនួន១១នាក់ក្នុងនោះមាន លោក សម រង្ស៊ី ប្រធានគណបក្សសង្គ្រោះជាតិ រួមនឹងលោក ហូរ វ៉ាន់ បានប្រកាសរួចហើយ ដោយនៅសល់២២នាក់ទៀត។
យោងតាមព័ត៌មានពីមន្ត្រីគណបក្សសង្គ្រោះជាតិបានឲ្យដឹងថា តំណាងរាស្ត្រគណបក្សសង្គ្រោះជាតិដែលជាប់កាតព្វកិច្ចកំពុងរៀបចំទម្រង់ពាក្យប្រកាសទ្រព្យសម្បត្តិនេះទៅតាមការទាមទាររបស់អង្គភាពប្រឆាំងអំពើពុករលួយជាបន្តបន្ទាប់៕
តំណាងរាស្រ្តគណបក្សសង្រ្គោះជាតិ
