ភ្នំពេញ: សមត្ថកិច្ចបានបញ្ជាក់ថា នៅព្រលប់ថ្ងៃទី៤នេះ សាលាដំបូងរាជធានីភ្នំពេញបាន សម្រេចចោទ ប្រកាន់លើមនុស្ស៤នាក់ ជាអង្គ រក្សរបស់(ឧកញ៉ា) ថោង សារ៉ាត់ ពីបទមនុស្សឃាតគិតទុកជាមុន និងបទសមគំនិតក្នុងករណីឃាតកម្មលើរូបលោកឧកញ៉ា អ៊ឹង ម៉េងជឺ ថៅកែត្បូងពេជ្រ។
ប្រភពព័ត៌មានបានឲ្យដឹងថា កាលពីរសៀលម៉ោង៣ ថ្ងៃទី៤ ខែធ្នូ ឆ្នាំ២០១៤ សមត្ថកិច្ចព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ បានបញ្ជូនខ្លួនអង្គរក្ស ៤នាក់ របស់(ឧកញ៉ា )ថោង សារ៉ាត់ មកកាន់អយ្យការអមសាលាដំបូងរាជធានីភ្នំពេញ ដោយភ្ជាប់សេចក្តីសន្និដ្ឋាន ពីបទឃាតកម្មគិតទុកជាមុន ពាក់ព័ន្ឋការបាញ់សម្លាប់លោកឧកញ៉ា អ៊ឹង ម៉េងជឺ ។
ប្រភពបន្តថា នីតិវិធីបានបន្តរហូតមកទល់ព្រលប់ថ្ងៃដដែលទើបបញ្ចប់ការស៊ើបសួរ ហើយលោកព្រះ រាជអាជ្ញារង កែវ សុជាតិ បានសម្រេចចោទប្រកាន់ក្រុមជនសង្ស័យទាំង៤នាក់នេះ ពីបទឃាតកម្មគិត ទុកជាមុន និងសមគំនិតរួចបញ្ជូនសំណុំរឿងទៅចៅក្រមស៊ើបសួរ ដើម្បីចាត់ការបន្តតាមនីតិវិធី។ ដោយឡែក( ឧកញ៉ា) ថោង សារ៉ាត់ ដែលគេចោទថាជាមេខ្លោងនោះ មិនទាន់ ចាប់ខ្លួនបាននៅឡើយទេ ។
ប្រភពបន្តទៀតថា សមត្ថកិច្ចនឹងបញ្ជូនអង្គរក្ស៤នាក់របស់(ឧកញ៉ា) ថោង សារ៉ាត់ មកតុលាការម្តងទៀតនៅព្រឹកថ្ងៃទី៥ ខែធ្នូ ឆ្នាំ២០១៤ នេះ ដើម្បីឱ្យចៅក្រមស៊ើបសួរសម្រចឃុំខ្លួនបណ្តោះអាសន្ននៅពន្ឋនាគារព្រៃ ស ។
សមត្ថកិច្ចបានឲ្យដឹងថា អង្គរក្សទាំង៤នាក់នេះមាន ឈ្មោះ សៀង វាសនា អាយុ៤៤ឆ្នាំ ជាជនដល់ដល់ ត្រូវបានតុលាការចោទប្រកាន់ពីបទ “ ឃាតកម្មគិតទុកជាមុន ” ឈ្មោះ មាស សម្បត្តិ អាយុ២៧ឆ្នាំ ( អ្នកបើកម៉ូតូការពារ ) ឈ្មោះ កូយ ចាន់ថុល អាយុ២៩ឆ្នាំ ( អ្នកមើលផ្លូវ ) ឈ្មោះ លី សៅ អាយុ២៨ឆ្នាំ (អ្នកឌុបជនដៃដល់) ត្រូវបានតុលាការ ចោទប្រកាន់ពីបទសមគំនិតក្នុងអំពើឃាតកម្មគិតទុកជាមុន ។
ឈ្មោះ សៀង វាសនា ឈ្មោះ មាស សម្បត្តិ និង ឈ្មោះ កូយ ចាន់ថុល ត្រូវបាន សមត្ថកិច្ចឃាត់ខ្លួនកាលពីថ្ងៃទី០១ ខែធ្នូ ឆ្នាំ២០១៤ នៅចំណុចក្បែរស្ពានទី២ ភូមិចំរើនផល សង្កាត់បឹងទំពុន ខណ្ឌមានជ័យ ខណៈធ្វើ ដំណើរតាមរថយន្តទំនើបមួយគ្រឿងរួមមាន(ឧកញ៉ា) ថោង សារ៉ាត់ ។ ដោយឡែក ឈ្មោះ លី សៅ អាយុ២៨ឆ្នាំ (អ្នកឌុបជនដៃដល់) ត្រូវបានសមត្ថកិច្ចឃាត់ខ្លួន កាលពីវេលាថ្ងៃត្រង់ថ្ងៃទី០៣ខែធ្នូឆ្នាំ២០១៤។
ជនសង្ស័យ ទាំង៤នាក់នេះ ត្រូវបានចោទប្រកាន់ក្នុងសំណុំរឿងបាញ់សម្លាប់លោកឧកញ៉ា អ៊ឹង ម៉េងជឺ ប្រព្រឹត្តកាលវេលាម៉ោង ៧ និង ១៨នាទី យប់ថ្ងៃទី២២ ខែវិច្ឆិកា ឆ្នាំ២០១៤ ខណៈពេលលោកឧកញ៉ា អ៉ឹង ម៉េងជឺ ចុះពីរថយន្តឡិចស៊ីស ៥៧០ ដើម្បីទៅទិញផ្លែឈើ នៅមុខហាងលក់ផ្លែឈើយីហោ ឡោ តិចសេង ស្ថិតនៅផ្លូវលេខ ២៧៤ សង្កាត់ទួលស្វាយព្រៃទី២ ខណ្ឌចំការមន ជិតស្តាតអូឡាំពិក។
អ្នកនាំពាក្យអគ្គស្នងការដ្ឋាននគរបាលជាតិ លោកនាយឧត្តមសេនីយ៍ឯក គៀត ច័ន្ទថារិទ្ធ បានបញ្ជាក់ប្រាប់អ្នកកាសែតថា (លោកឧកញ៉ា )ថោង សារ៉ាត់ គឺជាមេខ្លោងជួលឃាតករក្នុងការបាញ់សម្លាប់ លោកឧកញ៉ា អ៊ឹង ម៉េងជឺ ។ ខណៈនេះសមត្ថកិច្ចកំពុងតែតាមស្វែងរកចាប់ខ្លួន(លោកឧកញ៉ា) ថោង សារ៉ាត់ ដែលបានរត់គេចខ្លួនបន្ទាប់ពីបានដឹងថា អង្គរក្សរបស់ខ្លួនបានសារភាពទាក់ទងករណីបាញ់សម្លាប់លោកឧកញ៉ា អ៊ឹង ម៉េងជឺ រួចមក។
កាលពីយប់ថ្ងៃទី៣ ខែធ្នូ ឆ្នាំ២០១៤ កម្លាំងសមត្ថកិច្ច បានដឹកនាំដោយ លោកនាយឧត្តមសេនីយ៍ឯក ជួន សុវណ្ណ ស្នងការនគរបាលរាជធានីភ្នំពេញ ដោយមានការចូលរួមពីសំណាក់លោក ព្រះរាជអាជ្ញារង មាស ច័ន្ទពិសិដ្ឋ បានចុះប្រតិបត្តិឆែកឆេរបុរី ៩៩៩ នៅជាប់វត្តចាក់អង្រែក្រោម និងនៅបុរីញូវយ៉ក ៩៩៩ នៅសង្កាត់បឹងទំពុន ខណ្ឌមានជ័យ ដោយបានឃាត់ខ្លួនឪពុក ម្តាយ ប្រពន្ធ និងប្អូនប្រុស រួមទាំងអង្គរក្ស សរុបទាំងអស់១៤នាក់ នាំយកទៅសាកសួរ នៅស្នងការដ្ឋាននគរបាលរាជធានីភ្នំពេញ និងដកហូតវត្ថុតាងមួយចំនួន។
អ្នកនាំពាក្យ អគ្គស្នងការនគរបាលជាតិ បានមានប្រសាសន៍ថា កិច្ចប្រតិបត្តិការ ក្នុងការវែកមុខឃាតករ បាញ់សម្លាប់លោកឧកញ៉ា អ៊ឹង ម៉េងជឺ គឺទទួលបានលទ្ធផលហើយ ហើយក៏បានធ្វើការឃាត់ខ្លួន ជនពាក់ព័ន្ធ និងវត្ថុតាងផ្សេងៗ មួយចំនួនទៀត ផងដែរ។ លទ្ធផលក្នុងកិច្ចប្រតិបត្តិការ ជាបឋម គឺកម្លាំងនគរបាល បានចាប់ខ្លួនជនសង្ស័យ ដែលជាឃាតករមួយរូប និងបក្ខពួកមួយចំនួនទៀត។
លោកបានបន្តថា នៅពេលនេះ នគរបាលបានចាប់ខ្លួនឃាតករម្នាក់ និងបក្ខពួក ៣ នាក់ទៀត ដែលជាអ្នកបើក ម៉ូតូឌុបឃាតករ និងជនសង្ស័យ ពីរនាក់ទៀត ដែលជាអ្នកជិះម៉ូតូ ការពារពីក្រោយ ខណៈមេខ្លោងឃាតករ គឺលោកឧកញ៉ា ថោង សារ៉ាត់ កំពុងរត់គេខ្លួន។
លោកបាន បញ្ជាក់ថា ក្នុងកិច្ចប្រតិបត្តិការនេះ សមត្ថកិច្ច ក៏បានចាប់ខ្លួនឪពុកម្ដាយ លោកឧកញ៉ា ថោង សារ៉ាត់ ដែលជាអ្នកសមគំនិត ក្នុងការលាក់ខ្លួនឃាតករ និងបក្ខពួក ដោយនគរបាល ក៏បានដកហូតអាវុធ ចំនួន៦ដើម និងភស្តុតាងនានា មួយចំនួនទៀតផងដែរ។
មន្ដ្រីនគរបាលព្រហ្មទណ្ឌរាជធានីភ្នំពេញមួយរូបបានថ្លែងថា ឪពុក(ឧកញ៉ា)ថោង សារ៉ាត់ ឈ្មោះ តាំង សុខ ហៅ ថោង ចំរើន និងម្តាយឈ្មោះ កែវ សារី មន្ដ្រីយោធាពាក់ស័ក្ដិ៤កន្លះ នៅក្រសួងការពារជាតិ ត្រូវបានសមត្ថកិច្ចឃាត់ខ្លួនកាលពីយប់ថ្ងៃទី៣ ខែធ្នូ ឆ្នាំ២០១៤ ។
តាមប្រភពព័ត៌មានបានឲ្យដឹងថា នៅព្រឹកថ្ងៃទី៥ ខែធ្នូ ឆ្នាំ២០១៤ សមត្ថកិច្ចនឹងបញ្ជូនម្តាយឪពុក របស់ឧកញ៉ា ថោង សារ៉ាត់ មកកាន់អយ្យការអមសាលាដំបូងរាជធានីភ្នំពេញ ដោយភ្ជាប់សេចក្តីសន្និដ្ឋានចោទប្រកាន់ពីបទរារាំងសមត្ថកិច្ច និងបទរក្សាទុកអាវុធខុសច្បាប់ ។ ការចោទប្រកាន់នេះ បន្ទាប់ពី អ្នកទាំងពីរចេញមុខមកធ្វើសន្និសីទកាសែត ដោយទុកឱកាសឱ្យកូនប្រុសរបស់ខ្លួន(ឧកញ៉ា) ថោង សារ៉ាត់ រត់គេចខ្លួន ដូច្នេះវាជាការរំខាន និងរារាំងពីដំណើរការប្រតិបត្ដិការរបស់សមត្ថកិច្ច និងក្នុងប្រតិបត្តិការឆែរឆេរ សមត្ថកិច្ចបានរកឃើញអាវុធ៦ដើមក្នុងភូមិគ្រឹះអ្នកទាំងពីរទៀតផង ។
គួរជម្រាបថា ផ្អែកតាមមាត្រា២០០ និង ២៩ នៃក្រមព្រហ្មទណ្ឌ ឃើញថាក្រុមជនត្រូវចោទខាងលើនេះ អាចប្រឈមមុខនឹងការផ្តន្ទាទោសជាប់ពន្ឋនាគារអស់មួយជីវិតប្រសិនបើតុលាការរកឃើញថាមានពិរុទ្ឋភាពដូចការចោទប្រកាន់នោះមែន ៕ ស្មីត
អតីតអង្គរក្ស(ឧកញ៉ា)ថោង សារ៉ាត់ ពេលនាំមក សាកសួរនៅសាលាដំបូងរាជធានីភ្នំពេញថ្ងៃទី៤ធ្នូ
