ដោយ៖ប៉ែន សុផល
បាត់ដំបង៖កម្លាំងបង្ការបង្ក្រាបនៃស្នងការដ្ឋាននគរបាលខេត្តបាត់ដំបងសហការជាមួយកម្លាំងនៃអធិការដ្ឋាននគរបាលស្រុកសង្កែបានចុះប្រតិបត្តិការបង្ក្រាបទីតាំងទទួលផលចោរកម្មមួយកន្លែង និងឃាត់ខ្លួនជនសង្ស័យពាក់ព័ន្ធម្នាក់បញ្ជូនទៅកាន់តុលាការ។
ហេតុការណ៍បង្ក្រាបករណីនេះធ្វើឡើងកាលពីរសៀលថ្ងៃទី២១ ខែកញ្ញា ឆ្នាំ២០១៦ នៅចំណុចភូមិអូសទូក ឃុំកំពង់ព្រៀង ស្រុកសង្កែ ខេត្តបាត់ដំបង។
លោក ឈឿង គឹមសុង មេក្រុមបង្ការបង្ក្រាបនៃស្នងការដ្ឋាននគរបាលខេត្តបាត់ដំបងបានបញ្ជាក់ថាក្រោយពីទទួលបានសេចក្តីរាយការណ៍ថា ទីតាំងខាងលើមានការនាំយកម៉ូតូចូលជាបន្តបន្ទាប់ និងបានដោះបំបែកច្រកក្នុងកេសរួចដឹកចេញតាមរថយន្តទៅកាន់ខេត្តផ្សេងៗផងនោះ លោកក៏បានសុំការអនុញ្ញាតពីលោកស្នងការនិងធ្វើការចុះបង្ក្រាបតែម្តង។
លោកបន្តថា ក្នុងកិច្ចប្រតិបត្តិការខាងលើនេះសមត្ថកិច្ចបានឃាត់ខ្លួនជនសង្ស័យពាក់ព័ន្ធម្នាក់ឈ្មោះហឿង រ័ត្នមុន្នី ហៅតឿ ភេទប្រុស អាយុ២៨ឆ្នាំ រស់នៅភូមិអូសទូក ឃុំកំពង់ព្រៀង ស្រុកសង្កែ ខេត្តបាត់ដំបង។ វត្ថុតាងដកហូតបានម៉ូតូចំនួន២គ្រឿង ស្លាកលេខចំនួន២ កាតគ្រីចំនួន១ រួមនិងគ្រឿងបំលាស់ម៉ូតូមួយចំនួនធំ។
បច្ចុប្បន្នជនសង្ស័យពាក់ព័ន្ធខាងលើរួមនិងវត្ថុតាងត្រូវបានសមត្ថកិច្ចជំនាញកំពុងធ្វើការសាកសួរ និងកសាងសំណុំរឿងបញ្ជូនបន្តទៅកាន់តុលាការដើម្បីចាត់ការទៅតាមផ្លូវច្បាប់៕
