រាជធានីភ្នំពេញ៖សម្តេចតេជោ ហ៊ុន សែន បានសរសេរសារបង្ហោះនៅលើ Facebook របស់សម្តេចថា នៅមុននេះបន្តិចថា ពេលនេះ រដ្ឋសភាដំណើរការអនុម័តច្បាប់ ជាធម្មតាហើយរដ្ឋសភាមិនមែន ជាចំណាប់ខ្មាំងរបស់ក្រុមណាទេ។ សម្តេចបានលើកឡើងថា «ទោះមាន់មិនរងាវ ក៏ព្រះអាទិត្យរះដែរ»។
សម្តេច ហ៊ុន សែន សរសេរថា ពេលនេះកំពុងប្រជុំរដ្ឋសភា ដែលជាដំណើការធម្មតានៃអង្គនីតិបញ្ញតិ។ ដោយរបៀបវារះច្រើនថ្ងៃនេះ ច្បាស់ជាបាយថ្ងៃត្រង់នៅរដ្ឋសភាទៀតហើយ ហើយការប្រជុំច្បាស់ជាអូសបន្លាយរហូតដល់ពេលល្ងាច។ ទោះមាន់មិនរងាវ ក៏ព្រះអាទិត្យនៅរះដដែលព្រោះមិនមែនជាចំណាប់ខ្មាំងរបស់ក្រុមណាមួយនោះទេ ។
សាររបស់សម្តេច ហ៊ុន សែន គឺជាការឆ្លើយតបភ្លាមៗ ចំពោះការបន្តធ្វើពហិកាមិនចូលប្រជុំសភារបស់ក្រុមអ្នកតំណាងរាស្ត្រ CNRP ដែលសភាបានដំណើរការប្រជុំនៅព្រឹកថ្ងៃសុក្រនេះ ។
សូមជំរាបថា នៅព្រឹកថ្ងៃទី០៧ ខែតុលា ឆ្នាំ២០១៦នេះ រដ្ឋសភាបានបើកសម័យប្រជុំពេញអង្គលើកទី៧ សម្រាប់នីតិកាលទី៥នេះ ដោយមានរបៀបវារៈចំនួន៨ នឹងត្រូវពិភាក្សានិងអនុម័ត។ ប៉ុន្តែបក្សប្រឆាំង ដែលបានត្រៀមខ្លួនរួចជាស្រេច ដើម្បីចូលសភានោះ បានផ្លាស់ប្តូរជំហររបស់ខ្លួនឯងវិញ៕
