ខេត្តក្រចេះ៖លោក សេក បរិសុទ្ធ អ្នកសារព័ត៌មានចាស់វស្សានិងជាគ្រូបង្រៀនផ្នែកសារព័ត៌មាននៅសាកលវិទ្យាលភូមិន្ទភ្នំពេញ បានទទួលមរណៈភាពហើយ កាលពីម្សិលមិញ ដោយជួបគ្រោះថ្នាក់ចរចរណ៍ ។
លោក សេក បរិសុទ្ធ អាយុ៥០ឆ្នាំ បានជួបគ្រោះថ្នាក់ចរាចរណ៍ក្រឡាប់រថយន្ត នៅទឹកដីស្រុកសំបូរ ខេត្តក្រចេះ នៅរសៀលថ្ងៃទី១៦ ខែតុលា ឆ្នាំ២០១៦នេះ រហូតបាត់បង់ជីវិត។
លោក សេក បរិសុទ្ធ រួមដំណើរជាមួយបុគ្គលិក២នាក់ទៀត របស់លោក កំពុងធ្វើដំណើរទៅបំពេញបេសកកម្មការងារខេត្តរតនគិរី (លោកអង្គុយខាងមុខជាប់តៃកុង) ស្រាប់តែដល់ស្រុកសំបូរ ខេត្តក្រចេះ ក៏ជួបគ្រោះអកុសលតែម្តង។
អធិការនគរបាលស្រុកសំបូរ ខេត្តក្រចេះ បានបញ្ជាក់ថា គ្រោះថ្នាក់ចរាចរណ៍នេះ បានកើតឡើងនៅវេលាម៉ោង៣៖៣៥នាទីថ្ងៃទី១៦ ខែតុលា ឆ្នាំ២០១៦នេះ ស្ថិតនៅចំណុចអូរកណ្តៀរភូមិអូរព្រះ ឃុំអូរគ្រៀង ស្រុកសំបូរផ្លូវជាតិលេខ៧ ក្រចេះ-ស្ទឹងត្រែង ។ គ្រោះថ្នាក់នេះ កើតឡើង ខណៈដែល រថយន្តម៉ាកហ្វតពណ៌មាសពាក់ស្លាកលេខ OMG442002 របស់អង្គការ AEA របស់ជនរងគ្រោះបានធ្វើដំណើរពីទិសត្បូងទៅជើងដល់ចំណុចកើតហេតុគេចក្មេងរត់ឆ្លងកាត់ផ្លូវ បណ្តាលអោយក្រឡាប់ បណ្តាលឲ្យលោក សេក បរិសុទ្ធ ដែលអង្គុយនៅខាងមុខ ជាប់ជាមួយតៃកុង គៀបជាប់ជាមួយរថយន្ត ស្លាប់ភ្លាមៗតែម្តង។ ដោយឡែកជនរងគ្រោះ២នាក់ទៀត មានស្រីម្នាក់អង្គុយពីក្រោយ បានរងរបួសធ្ងន់ស្រាល៕
