ខេត្តពោធិ៍សាត់៖លោកយាយម្នាក់បានស្លាប់ភ្លាមៗនៅនឹងកន្លែងកើតហេតុដោយរថយន្តISUZU មួយគ្រឿងកំពុងតែបើកបានដាច់កង់មុខខាងឆ្វេង ហើយរត់ទៅបុកដល់ក្នុងផ្ទះ ដែលហេតុការណ៍គ្រោះថ្នាក់ដ៏គួរឲ្យរន្ធត់មួយនេះ កើតឡើងនៅវេលាម៉ោង០៦ និង២០នាទីព្រឹក ថ្ងៃទី២៥ ខែតុលា ឆ្នាំ២០១៦នេះ នៅលើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ ២១៩ និង២២០ ស្ថិតក្នុងភូមិស្វាយដូនកែវ១ ឃុំស្វាយដូនកែវ ស្រុកបាកាន ខេត្តពោធិ៍សាត់។
លោក នាង វុធ អធិការនគរបាលស្រុកបាកានបានឲ្យដឹងថា ហេតុការណ៍គ្រោះថ្នាក់ដ៏គួរឲ្យរន្ធត់មួយនេះ បង្កដោយរថយន្តម៉ាកISUZU ពណ៌បាំតង ពាក់ស្លាកលេខ ភ្នំពេញ 3A-2430 បើកបរដោយឈ្មោះ បូរ វណ្ណី ភេទប្រុស អាយុ ២៩ឆ្នាំ រស់នៅភូមិព្រៃស្វាយ ឃុំព្រៃស្វាយ ស្រុកម៉ោងឬស្សី ខេត្តបាត់ដំបង ធ្វើដំណើរពីលិចកើត លុះមកដល់ចំណុចកើតហេតុខាងលើ បានដាច់កង់មុខខាងឆ្វេង ហើយរត់ទៅបុកលោកយាយឈ្មោះ ជុច យុន អាយុ៦៧ឆ្នាំ ដល់ក្នុងផ្ទះ បណ្តាលឲ្យស្លាប់ភ្លាមៗនៅនឹងកន្លែងកើតហេតុ។
បច្ចុប្បន្នវត្ថុតាងរថយន្ត ត្រូវបានយកទៅរក្សាទុកនៅការិយាល័យចរាចរណ៍ផ្លូវគោក នៃស្នងការនគរបាលខេត្ត រងចាំដោះស្រាយនៅពេលក្រោយ ដោយឡែកសាកសពជនរងគ្រោះ ត្រូវបានក្រុមគ្រួសាររៀបចំធ្វើបុណ្យតាមប្រពៃណី៕
