ភ្នំពេញ៖ប្រជាការពារភូមិម្នាក់ ស្ថិតក្នុងស្ថានភាពស្រវឹងជោគ បានជិះម៉ូតូ១គ្រឿងដឹកកូនប្រុស២នាក់ ទៅប្ដឹងនគរបាល ប៉ុស្ដិ៍នគរបាលចោមចៅ ចោទប្រកាន់ឳពុកក្មេករបស់ខ្លួនថា បានវាយធ្វើបាបកូនប្រុស របស់គាត់ដែលមានអាយុទើបតែ៣ឆ្នាំ។
ខណៈពេលទៅដល់ប៉ុស្ដិ៍នគរបាលបានស្រែកយំឱបកូនប្រុស ទាំងពីរនាក់របស់ខ្លួន ហើយសុំឲ្យនគរបាលចាត់ការឳពុកក្មេក។ ប៉ុន្តែដោយសារគ្មានរបួសស្នាម និងមើលទៅគ្រាន់តែវាយដោយរំពាត់តូចតាចនិងវាយបន្តិចបន្តួច ជាការប្រដៅមិនមែនធ្វើទារុណកម្មក្នុងការ ស្អប់នោះ នគរបាលបានធ្វើការពន្យល់ ទើបបុរសនោះចាកចេញទៅវិញ ឈប់ប្ដឹងផ្ដល់តទៅទៀត។ ហេតុការណ៍នោះកើតឡើង កាលពីវេលាម៉ោង៥ និង៣៥នាទីល្ងាចថ្ងៃទី២៥ ខែតុលា ឆ្នាំ២០១៦នៅក្នុងសាលាសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
បុរសខាងលើនោះឈ្មោះ ស៊ឹម ចន្នី អាយុ៣១ឆ្នាំ ជាប្រជាកាពារភូមិបល្ល័ង្ក ឃុំសំបូរ ស្រុកបាធាយ ខេត្តកំពុងចាម រហស្សនាមបល្ល័ង្ក១០ និងមានប្រពន្ធឈ្មោះ ទូច សុខឿន អាយុ៣១ឆ្នាំ កម្មការិនីរោងចក្រកាត់ដេរ មានកូនប្រុស២នាក់។ដោយឡែកកូនប្រុសដែលបុរសនោះអះអាងថា ត្រូវឳពុកក្មេកវាយនោះឈ្មោះ ស៊ឹម មាសសុខ សោភា អាយុ៣ឆ្នាំ ចំណែកឪពុកក្មេកដែលរងការចោទប្រកាន់ នោះឈ្មោះ ទូច ម៉េត អាយុជាង៥០ឆ្នាំ មុខរបរចុងភៅ មានទីលំនៅក្នុងភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ។
បុរសនោះបាននិយាយទាំងយំឱបកូនថា ខ្លួនរស់នៅក្នុងភូមិឯណោះទេហើយក៏ជាប្រធានក្រុមប្រជាការពារភូមិនោះដែរ ប៉ុន្តែបានឈ្លោះគ្នាបន្តិចបន្តួចជាមួយប្រពន្ធកាលពីប៉ុន្មានថ្ងៃមុន។បន្ទាប់មកប្រពន្ធរបស់គាត់បាននាំកូនប្រុសទាំង២នាក់រត់ចេញពីផ្ទះ មកស្នាក់នៅផ្ទះឳពុកម្ដាយក្មេកនៅក្នុងភូមិជ្រៃកោង សង្កាត់ចោមចៅ។ក្រោយមកប្រពន្ធបានចូលធ្វើការរោងចក្រកាត់ដេរ ដោយបានផ្ញើរកូនឲ្យឳពុកម្ដាយក្មេកមើល ចំណែកគាត់ដោយជាប់ការងារមិនបានមកតាមនោះទេ រហូតដល់វេលាល្ងាច ថ្ងៃទី២៥ ខែតុលា ឆ្នាំ២០១៦ ដោយនឹករលឹកកូនពេក ក៏បានធ្វើដំណើរពីខេត្តកំពុងចាម មកលេងកូនហើយបានឃើញខ្នងកូនកន្ទួល ស្នាមរំពាត់ហើយពេលគាត់សួរកូនប្រាប់ថាជីតាវាយ។ ពេលនោះគាត់បានសួរនាំ ត្រូវឪពុកក្មេកជំរុញឲ្យប្ដឹងទើបគាត់ទៅប្ដឹងតែម្ដង ប៉ុន្តែដោយនគរបាលពន្យល់ពីបញ្ហាផ្សេងទើបគាត់ឈប់ប្ដឹងវិញ៕
