រថយន្ត២គ្រឿងបុកគ្នាគាបជាប់អ្នកបើកបរបាក់ជើង
រាជធានីភ្នំពេញ៖រថយន្តបែន២គ្រឿងបើកច្រាសទិសគ្នា ហើយបុកគ្នាយ៉ាងពេញទំហឹង បណ្តាលឲ្យអ្នកបើកបរម្នាក់របួស ជើងគៀបជាប់ក្នុងកាប៊ីនរថយន្ត ចំណែកអ្នកបើកបរម្ខាងទៀតរត់គេចខ្លួនបាត់។ ហេតុការណ៍កើតឡើងនៅម៉ោង៥ និង៣០នាទីព្រឹកថ្ងៃទី២៧ ខែតុលា ឆ្នាំ២០១៦ ស្ថិតនៅតាមបណ្តោយផ្លូវជាតិលេខ៣ ភូមិពងទឹក សង្កាត់ពងទឹក ខណ្ឌដង្កោ។
សមត្ថកិច្ចប្រាប់ថា ជនរងគ្រោះគៀបជាប់ក្នុងកាប៊ីន ឈ្មោះ ប៊ី ឃុន ភេទប្រុស អាយុ៥៥ឆ្នាំ មុខរបរ បើកបររថយន្តបែន ម៉ាក ហ៊ីយ៉ាន់ដាយ ពណ៌ស ពាក់ស្លាកលេខ ព្រះសីហនុ 3A-3553 ដឹកថ្មពេញរថយន្ត មានទីលំនៅភូមិស្លែងឃុំរំពេរ ស្រុកបសេដ្ឋ ខេត្តកំពង់ស្ពឺ និងអ្នករួមដំណើរម្នាក់ទៀត ជាព្រូរថយន្ត មានឈ្មោះ ជិន ស៊ីហា ភេទប្រុស អាយុ១៧ឆ្នាំ ត្រូវជាក្មួយ រស់នៅភូមិ ឃុំជាមួយគ្នា មិនមានរបួស៕
