ភ្នំពេញ៖រថយន្តបែនមួយគ្រឿង បោះពួយក្នុងល្បឿនលឿនវ៉ាជែងជ្រុលចង្កូតជ្រុលទៅបុករថយន្តបែនមួយគ្រឿងទៀត បើកច្រាសទិស យ៉ាងពេញទំហឹង បណ្តាលឲ្យអ្នកបើកបរម្នាក់របួសជើងគាបជាប់ក្នុងកាប៊ីនចំណែកអ្នកបើកបរម្ខាងទៀតរត់គេចទៅបាត់។ ហេតុការណ៍នេះកើតឡើងកាលពីវេលាម៉ោង៥និង៣០នាទីព្រឹកថ្ងៃទី២៧ ខែតុលា ឆ្នាំ២០១៦ស្ថិតនៅតាមបណ្តោយផ្លូវជាតិលេខ៣ ភូមិពងទឹក សង្កាត់ពងទឹក ខណ្ឌដង្កោ ។
ជនរងគ្រោះ គាបជាប់ក្នុងកាប៊ីនឈ្មោះ ប៊ី ឃុន ភេទប្រុស អាយុ៥៥ឆ្នាំ មុខរបរ បើកបររថយន្ត បែន កង់៦ម៉ាក ហ៊ីយ៉ាន់ដាយពណ៌ស ពាក់ស្លាកលេខព្រះសីហនុ 3A-3553 ដឹកថ្មពេញរថយន្តមានទីលំនៅភូមិស្លែងឃុំរំពេរ ស្រុកបសេដ្ឋ ខេត្តកំពង់ស្ពឺនិងអ្នករួមដំណើរម្នាក់ទៀត ជាព្រូរថយន្ត មានឈ្មោះ ជិន ស៊ីហា ភេទប្រុស អាយុ១៧ឆ្នាំ ត្រូវជាក្មួយ រស់នៅភូមិ ឃុំជាមួយគ្នា មិនមានរបួស ។
ចំណែករថយន្តមួយគ្រឿងទៀត ប្រភេទបែន កង់៦ ពណ៌ស ម៉ាក MISTUBISI ពាក់ស្លាកលេខ ចង្កូតស្តាំ PP-0176 អ្នកបើកបរ មិនស្គាល់អត្តសញ្ញាណ ក្រោយកើតហេតុ បានគេចខ្លួនបាត់ ។
តាមប្រភពនៅកន្លែងកើតហេតុបានឲ្យដឹងថា មុនកើតហេតុ រថយន្តបង្ក ម៉ាក MISTUBISI បើកបោះពួយ ពីជើងទៅត្បូងល្បឿនលឿន ដល់ចំណុចខាងលើ វ៉ាជែងរថយន្តខាងមុខរេចង្កូតជ្រុលទៅទៅបំណែកផ្លូវម្ខាង ជ្រុលទៅបុករថយន្តបែន មួយគ្រឿងទៀត បើកពីត្បូងទៅជើងច្រាសទិសគ្នាបណ្តាលឲ្យរថយន្តទាំង២គ្រឿងគាបជាប់ក្បាលគ្នា រងរបួសអ្នកបើកបរ ម្នាក់គាបជាប់នៅក្នុងកាប៊ីន របួសជើង រីឯអ្នកបើកបររថយន្តបង្កបានគេចខ្លួនបាត់ ។
ក្រោយកើតហេតុ ជនរងគ្រោះត្រូវបាន ក្រុមសង្គ្រោះរបស់អង្គភាព៧១១ កងពលតូចលេខ៧០ យករថយន្ត និងឧបករណ៏ទៅវះទាញយកជនរងគ្រោះ និងដឹកបញ្ជូនទៅមន្ទីរពេទ្យព្រះកុសុមៈ ។
ដោយឡែករថយន្តទាំងពីរគ្រឿង ត្រូវបាន សមត្ថកិច្ចជំនាញ វាស់វែងរួចយកទៅរក្សាទុកនៅផ្នែកជំនាញ អធិការដ្ឋានខណ្ឌ រងចាំដោះស្រាយពេលក្រោយ៕
