ខេត្តកំពង់ចាម៖កម្លាំងសមត្ថកិច្ចនគរបាលស្រុកចំការលើកាលពីវេលាម៉ោង៥ និង២៥នាទីព្រឹក ថ្ងៃទី២៧ ខែតុលា ឆ្នាំ២០១៦ បានឃាត់ខ្លួនបុរសម្នាក់នៅលើកំណាត់ផ្លូវលេខ៧១ ស្ថិតក្នុងភូមិថ្នល់បែកលិច ឃុំស្វាយទាប ស្រុកចំការលើ ខេត្តកំពង់ចាម ពាក់ព័ន្ធលួចរថយន្តពីភ្នំពេញ។
តាមមន្ត្រីនគរបាល បានឲ្យដឹងថា ដោយមានការសហការ ជាមួយម្ចាស់រថយន្តទើបសមត្ថកិច្ច ឈានទៅធ្វើការឃាត់ខ្លួនជនសង្ស័យ ព្រមទាំងបានធ្វើការដកហូត វត្ថុតាងរថយន្តមកវិញផងដែរ។
សមត្ថកិច្ចបានបញ្ជាក់ថា កាលពីយប់ថ្ងៃទី២៦ ខែតុលា ឆ្នាំ២០១៦ នៅចំណុចឃុំបែកចានក្នុងស្រុកអង្គស្នួល ខេត្តកណ្តាល បុរសជាម្ចាស់រថយន្តស្រវឹង ដោយបើករថយន្តទៅមុខមិនរួច ក៏ត្រូវបានជនសង្ស័យ ជិះម៉ូតូ១គ្រឿងមកសួរនាំ ហើយម្ចាស់រថយន្ត ក៏បានពឹងពាក់ឲ្យជនសង្ស័យ ជូនទៅហាង ម៉ាស្សា១មួយកន្លែង ដើម្បីរកសេវាកោសជប់ ។ ក្រោយពីទៅដល់ហាងម៉ាស្សា ជនសង្ស័យក៏បានសុំបើករថយន្ត ទៅទិញភេសជ្ជៈមួយភ្លែត ហើយក៏ទៅបាត់រហូតតែម្ដង ក្រោយពីដឹងថា រថយន្តត្រូវបានគេលួចយកទៅបាត់ម្ចាស់រថយន្ត ក៏ទូរស័ព្ទទៅប្តឹងសមត្ថកិច្ច ដើម្បីឲ្យជួយអន្តរាគម៍តាមរក គ្រាដែលដឹងថាជនសង្ស័យ ជិះឆ្ពោះមកកាន់ខេត្តកំពង់ចាម ។
សមត្ថកិច្ចបានតាមប្រមាញ់ ឃាត់រថយន្ដនោះមកវិញ ។ រថយន្តដែលត្រូវចោរលួចម៉ាកហាយឡែនឌ័រ ពណ៌ទឹកប្រាក់ មានស្លាកលេខភ្នំពេញ 2AI-7843 និងឃាត់ខ្លួន មនុស្ស២នាក់ ១-ឈ្មោះទ្រី រិត ភេទប្រុស អាយុ៤២ឆ្នាំ មានទីលំនៅភូមិដំបូកខ្ពស់ ឃុំលាយបូរ ស្រុកត្រាំកក់ ខេត្តតាកែវ បច្ចុប្បន្នស្នាក់នៅផ្ទះជួលនៅ រាជធានីភ្នំពេញ និងនារីម្នាក់ឈ្មោះ អ៊ុល សុវណ្ណារី អាយុ៣៧ឆ្នាំ នៅភូមិ៤ សង្កាត់បឹងកេងកងទី៣ ខណ្ឌចំការមន រាជធានីភ្នំពេញ៕
